काठमाडौं । बीमा समितिले निर्जीवन बीमा कम्पनीका प्रमुख कार्यकारी अधिकृत, अध्यक्ष, सर्वाधिक धेरै शेयर पूँजी भएका मध्ये एक जना संस्थापकहरुलाई छलफलका लागि बोलाएको छ । बीमा समितिले भोलि दिउसो तीन बजे होटल इम्पेरियलमा छलफलका लागि बोलाएको हो ।
बीमा समितिले पहिलो चरणमा निर्जीवन बीमा कम्पनीका शेयरधनी तथा प्रमुख कार्यकारी अधिकृतहरु सँग छलफल गर्ने योजना बनाएको छ । बीमा समितिले अध्यक्षहरु तथा प्रमुख लगानीकर्ताको कुराहरु सुन्नेछ । उनिहरुका कुराहरु सुनिसके पछि बीमा समितिले पनि आफ्नो राय प्रस्तुत गर्ने जनाएको छ ।
बीमा समितिले चैत १० गते निर्जीवन बीमा कम्पनीहरुलाई एक महिना भित्रमा साढे दुई अर्ब रुपैयाँ पूँजी जुटाउने कार्योजना पेश गर्न निर्देशन दिएको थियो । समितिको निर्देशन अनुरुप सम्पुर्ण कम्पनीहरुले आ-आफ्नो योजना पेश गरिसकेका छन् ।
समितिले सम्पुर्ण कम्पनीहरुको पूँजी बृद्धि योजना हेरिसके पछि पहिलो चरणमा छलफल गर्न थालेको हो । अधिकाम्स बीमा कम्पनीहरुले पहिला बोनस शेयर, बोनस शेयर वितरण पछि कायम पूँजीमा हकप्रद शेयर निष्काशन गर्ने योजना पेश गरेका छन् । केहि कम्पनीहरुले भने मर्जरमा जाने योजना समेत पेश गरेका छन् ।
बीमा समितिले अहिलेलाई सबैभन्दा पहिला क्रस होल्डिङ देखिएका कम्पनीहरुलाई मर्जरका लागि दवाव दिने रणनीति बनाएको छ । क्रस होल्डिङ भएका कम्पनीलाई मर्जरमा लगिसके पछि कमजोर र पूँजी कम भएका कम्पनी आफ्नै मर्जरमा जाने समितिको बुझाइ छ ।
