काठमाडौं । प्रधानमन्त्री कृषि आधुनिकीकरण परियोजना कार्यान्वयन इकाई रामेछाप जुनार जोन मार्फत रामेछाप न.पा. वडा नं..०६ पुरानागाउँमा जुनारको बीमा गरिएको छ ।
जुनार किसान शेर बहादुर तमाङको २३५ बोट, हेम बहादुर तमाङको २५० बोट र पृथे तमाङको १३० बोटको जुनार बीमालेख आइएमई जनरल इन्स्योरेन्स लि ले किसानको बगैंचमा नै गएर हस्तान्तरण गरेको हो । उक्त जुनारको पिसिआर परिक्षण राष्ट्रिय सुन्तला जात अनुसन्धान कार्यक्रम पारिपात्ले धनकुटा प्रयोगशालामा गरिएको थियो ।
उक्त रिपोर्ट नेगेटिभ आएपछि र बगैंचाको जुनारको बोट स्वस्थ भएको हुदा फलफुल बीमा गर्न योग्य भएको जानकारी प्रधानमन्त्री आधुनिकिकरण परियोजना कार्यान्वयन इकाई रामेछापका प्रमुख थिरलाल गैरेले जानकारी दिए । परियोजना कार्यालयले जुनार बगैंचामा रोग लाग्न नदिनका लागी १० जना व्यक्तिलाई किसानको जुनार बगैंचामा गएर विषादी छर्ने टोली बनाइएको गैरेले बताए ।
उक्त बीमालेख आइएमई जनरल इन्स्योरेन्स लि. का शाखा प्रमुख विपिन भट्टराइले किसानको फलफुल बगैंचामै गएर जुनार बीमालेख हस्तान्तरण गरेका हुन् ।
जुनारको बीमा गरेपछि कृषकहरु थप उत्साहित भएका छन । कुनै कारणबाट जुनार खेतीमा हानीनोक्सानी भएमा अधिकतम बीमाङक रकमको सिमा भित्र रही वास्तविक क्षतिको ९० प्रतिशत रकम भुक्तानी गरिने आइएमई जनरल इन्स्योरेन्सले जनाएको छ ।
