काठमाडौं । बीमा समितिले जीवन बीमा कम्पनीहरुले प्रस्ताव गरेका एक्चुअरीलाई स्वीकृत प्रदान गरेको छ । एक्चुअरीको नियुक्ति गर्नु अगाडी बीमा समितिबाट अनुमति लिनु पर्ने व्यवस्था सँगै उनिहरुले स्वीकृतिका लागि पेश गरेका थिए ।
जीवन बीमा कम्पनीले नियुक्ति गरेका सम्पुर्ण एक्चुअरी विदेशी छन् । अधिकाम्स एक्चुअरी भारतीय नागरिक रहेका छन् । नेपाल लाइफले सुतिम पट्रामलाइलाई नियुक्त गरेको छ । त्यस्तै नेशलन लाइफले गोपाल भि कुमार, राष्ट्रिय बीमा संस्थानले जिएन अग्रवाल, एलआइसीले सञ्जिव कुमार पुजारीलाई नियुक्त गरेको छ ।
नेपाली बीमा कम्पनीले एक्चुअरीलाई एक्चुअरी प्रतिवेदन बनाए बापत दुईदेखि १० लाख रुपैयाँ भुक्तानी गर्ने गरेका छन् । एउटा एक्चुअरी मूल्याङ्कनका लागि उनिहरुले एकदेखि दुई महिना लगाउने गरेका छन् । विश्वमै एक्चुअरीको संख्या कम भएकाले उनिहरुले नेपाली बीमा कम्पनीलाई कम प्राथमिकतामा राख्ने गरेका छन् । अहिले नियुक्ति भएका व्यक्तिहरु पनि संस्थागत रुपमा प्रतिनिधि हुन् । यसरी संस्था मार्फत एक्चुअरी मूल्याङ्कन गर्दा अझ ढिलाइ हुने गरेको छ । यस्ता संस्थाले विश्वका ठुला ठुला कम्पनीहरुलाई पहिलो प्राथमिकता दिने भएकाले नेपाली बीमा कम्पनी प्राथमिकतामा पर्दैनन् ।
अर्को तर्फ नेपाली बीमा कम्पनीहरुले प्रदान गर्ने एक्चुअरी शुल्क तुलनात्मक रुपमा कम हुन्छ । जति ठुला कम्पनी अझ जति ठुलो दायित्व हुन्छ त्यहि आधारमा एक्चुअरीले शुल्क निर्धारण गर्ने गरेका छन् । यहि कारणले उनिहरुले लिने शुल्कमा एकरुपता छैन ।
