काठमाडौं । नेपाल धितोपत्र बोर्डले दुई निर्जीवन बीमा कम्पनीलाई हकप्रद शेयर निष्काशनका लागि अनुमति दिएको छ । धितोपत्र बोर्डको हिजो बसेको बैठकले शिखर इन्स्योरेन्स कम्पनी र आइएमई जनरल इन्स्योरेन्स कम्पनीलाई हकप्रद शेयर निष्काशनको अनुमति दिएको हो ।
शिखरले ५२ करोड ७५ लाख रुपैयाँ र आइएमई जनरलले ४६ करोड ३० लाख रुपैयाँको हकप्रद शेयर निष्काशनका लागि बोर्डबाट अनुमति पाएका हुन् । शिखरले गत जेठ महिनामा बोर्डमा निवेदन दिएको थियो । त्यस्तै आइएमईले भने भदौ महिनामा निवेदन दिएको थियो ।
बीमा समितिले यि दुई कम्पनी बाहेक अन्य बीमा कम्पनीहरुलाई हकप्रद शेयर निष्काशनको लागि रोकेर राखेको छ । समितिले चालु आर्थिक वर्षमा कुनै पनि कम्पनीलाई हकप्रद शेयर निष्काशनको प्रस्ताव नै अगाडी नबढाउन निर्देशन दिएको थियो । सोहि कारण अहिले कुनै पनि बीमा कम्पनीले हकप्रद शेयर निष्काशनको प्रकृयाँ अगाडी बढाएका छैनन् ।
नेपाल धितोपत्र बोर्ड विगत ५ महिना भन्दा लामो समयदेखि अध्यक्ष विहिन छ । अध्यक्ष नहुँदा बोर्डले हकप्रद तथा प्राथमिक शेयर निष्काशनको अनुमति दिएको थिएन । तर केहि समय अगाडी विभिन्न कम्पनीहरुले हकप्रद शेयर निष्काशनको अनुमति दिनु पर्ने भन्दै बोर्डलाई दवाव दिएका थिए । त्यस पछि बल्ल बोर्डले अनुमति दिएको हो ।
