काठमाडौं । एक वर्षको अवधिमा जीवन बीमा कम्पनीहरुले २६.७३ प्रतिशतले पोलिसी संख्या बढाउन सफल भएका छन् । कम्पनीहरुले चालु आर्थिक वर्षको चार महिनाको अवधिमा ८९ लाख १९ हजार वटा जीवन बीमा पोलिसी जारी गरेका छन् । गत वर्षको यहि अवधिमा कम्पनीहरुले ७० लाख ३८ हजार पोलिसी जारी गरेका थिए ।
यस अवधिमा म्यादी जीवन बीमालेखको संख्यामा भने गिरावट आएको छ । चार महिनाको अवधिमा जीवन बीमा कम्पनीहरुले यस्तो बीमालेख ६ लाख २७ हजार वटा जारी गरेका थिए । जवकी गत वर्षको यहि अवधिमा भने ८ लाख एक हजार वटा जारी गरेका थिए ।
जीवन बीमा कम्पनीहरुले उक्त बीमा लेख जारी गरेर खुद बीमा शुल्क आर्जन पनि २३ प्रतिशतले बढाउन सफल भएका छन् । जीवन बीमा कम्पनीहरुले कार्तिक महिनासम्ममा ४८ अर्ब ३२ करोड रुपैयाँ खुद बीमा शुल्क आर्जन गरेका छन् ।
त्यस्तै निर्जीवन बीमा कम्पनीहरुले पनि चालु आर्थिक वर्षको चार महिनाको अवधिमा निर्जीवन बीमालेख ३४.६३ प्रतिशतले बृद्धि गर्न सफल भएका छन् । उनिहरुले यहि अवधिमा २७.३६ प्रतिशतले खुद बीमा शुल्क आर्जन बढाउन सफल भएका छन् ।
बीमा समितिका अनुसार बीमाको दायरामा २९.८१ प्रतिशत जनसंख्या बीमाको दायरामा आएका छन् । यदि बैदेशिक रोजगार बीमालेख संख्या घटाउने हो भने यस्तो दायरा २१.५५ प्रतिशतमा सिमित हुने समितिले जनाएको छ । एक वर्षको अवधिमा बीमा कम्पनीहरुको कार्यालय संख्या ३२ प्रतिशतले बढेको छ । हाल बीमा कम्पनीहरुको तीन हजार ७३८ वटा शाखा कार्यालयहरु छन् ।
कर्मचारीको संख्या भने ५.९४ प्रतिशतले मात्रै बढेको छ । हाल बीमा क्षेत्रमा १० हजार ७९८ जनाले रोजगारी पाएका छन् । जीवन बीमा कम्पनीहरुको चुक्ता पूँजी १७ प्रतिशतले बढ्दा निर्जीवनको भने ७.९६ प्रतिशतले मात्रै बढेको छ । हाल जीवन बीमा कम्पनीहरुको कुल चुक्ता पूँजी ३९ अर्ब ४४ करोड रुपैयाँ छ भने निर्जीवनको १९ अर्ब ८४ करोड रुपैयाँ छ ।
Monthly Report 2078.79_Kartika
