काठमाडौं । ग्लोबल आइएमई लघुवित्त वित्तीय संस्थाले प्रदेश नं. ३ र ४ अन्तर्गत रहेको ३५ वटा शाखा कार्यालयहरुको आर्थिक वर्ष २०७८/०७९ को प्रथम त्रैमासिक समिक्षा तथा शाखा प्रवन्धक गोष्ठि सम्पन्न गरेको छ । पोखराको लेकसाइड स्थित माइ होटलमा मंसिर ५ र ६ गते सञ्चालन भएको उक्त कार्यक्रमलाई वित्तीय संस्थाका प्रमुख कार्यकारी अधिकृत हरिकृष्ण जोशीले उद्धघाटन गरेका हुन् ।
कार्यक्रममा विभागीय प्रमुखहरुले ३५ वटा शाखाको प्रथम त्रैमासिक समिीक्षा र शाखा प्रवन्धक गोष्ठिको लागि सहजीकरण गरेका थिए । यस क्रममा शाखा प्रबन्धकहरुले कार्य विस्तारका क्रममा भोगेका समस्या, चुनौती, भावि रणनीतिहरु प्रस्तुत गर्दै शाखाको लक्ष्य अनुसारको प्रगति हासिल गर्ने प्रतिबद्धता जनाएका थिए ।
कार्यक्रमको समापनका क्रममा वित्तीय संस्थाका प्रमुख कार्यकारी अधिकृत जोशीले उत्कृष्ट शाखाहरुलाई प्रशंसा पत्र प्रदान गर्दै, वित्तीय संस्थाले हाल भोग्नुपरेका समस्याका साथै लघुवित्तको चुनौती तथा अवसरहरुको बारेमा जानकारी गराएका थिए । त्यस्तै, उनले वित्तीयसंस्थाको चालु त्रैमासको लक्ष्य प्राप्तीका रणनीति सँगै सफलताको शुभकामना दिए ।
कार्यसञ्चालन विभाग प्रमुख सुदिप आचार्यले सञ्चालन गरेको उक्त कार्यक्रममा वित्तीय संस्थाका नायब प्रमुख कार्यकारी अधिकृत, विभागीय प्रमुखहरु लगायत ३५ जना शाखा प्रबन्धकहरुको सहभागीता रहेको थियो ।