काठमाडौं । राष्ट्रिय बीमा संस्थाले चालु आर्थिक वर्षको पहिलो त्रैमाशिक अवधिमा ५२ प्रतिशतले मुनाफा बढाउन सफल भएको छ । कम्पनीले पहिलो त्रैमाशिक अवधिमा एक करोड ५६ लाख रुपैयाँ मुनाफा आर्जन गरेको हो ।
संस्थानले पहिलो त्रैमाशिक अवधिमा ७.६३ प्रतिशतले खुद बीमा शुल्क आर्जन बढाउन सफल भएको छ । यस अवधिमा संस्थाले ४ अर्ब ५३ करोड रुपैयाँ खुद बीमा शुल्क आर्जन गरेको छ । गत वर्षको यहि अवधिमा कम्पनीले ४ अर्ब २१ करोड रुपैयाँ आर्जन गरेको थियो । निजामति कर्मचारीहरुको जीवन बीमाको प्रिमियमले पनि संस्थानको व्यवसाय धानिइरहेको छ । जसमा राष्ट्र सेवक कर्मचारीहरुको बीमा शुल्क मात्रै तीन अर्ब ६८ करोड रुपैयाँ रहेको छ ।
समिक्षा अवधिमा संस्थाको खुद दाबी भुक्तानी पनि बढेको छ । असोज मसान्तसम्ममा कम्पनीले ९५ करोड ५७ लाख रुपैयाँको खुद दाबी भुक्तानी गरेको छ । गत वर्षको यहि अवधिमा संस्थाले ६८ करोड ३१ लाख रुपैयाँको दाबी भुक्तानी गरेको थियो ।
नेपाल सरकारबाटै सुरक्षित व्यवसाय पाइरहेको संस्थानको अभिकर्ता कमिसन खर्च भने यस पटक घटेको छ । अभिकर्ताले यस अवधिमा ४ करोड ८४ लाख रुपैयाँको कमिशन भुक्तानी गरेका छन् । गत वर्षको यहि अवधिमा अभिकर्ताहरुले ७ करोड ७३ लाख रुपैयाँ प्राप्त गरेका थिए ।
संस्थाको जीवन बीमा कोष एक वर्षको अवधिमा ३० अर्ब ४९ करोड रुपैयाँबाट बढेर ३७ अर्ब १४ करोड रुपैयाँ पुगेको छ । चुक्ता पूँजी १८ करोड १० लाख रुपैयाँ रहेको संस्थानको जगेडा कोषमा ३५ करोड ७७ लाख रुपैयाँ रहेको छ ।
