काठमाडौं । प्राइम लाइफ इन्स्योरेन्स कम्पनीले चालु आर्थिक वर्षको पहिलो त्रैमाशिक अवधिमा ९.७९ प्रतिशतले खुद बीमा शुल्क आर्जन बृद्धि गर्न सफल भएको छ । कम्पनीले पहिलो त्रैमाशिक अवधिमा एक अर्ब १७ करोड रुपैयाँ खुद बीमा शुल्क आर्जन गरेको हो । गत वर्षको यहि अवधिमा एक अर्ब ६ करोड रुपैया आर्जन गरेको थियो ।
यसै अवधिमा कम्पनीले १२ करोड २५ लाख रुपैयाँ मुनाफा आर्जन गरेको छ । गत आर्थिक वर्षको भन्दा १.४९ प्रतिशतले बढि हो । कम्पनीले २ करोड ४५ लाख रुपैयाँ नोक्सानीको लागि व्यवस्था गर्नु परेकाले मुनाफामा उल्लेख्य सुधार नदेखिएको हो ।
खुद दाबी भुक्तानी भने गत वर्षको भन्दा घटेको छ । गत वर्ष २६ करोड ६४ लाख रुपैयाँ खुद दाबी भुक्तानी गरेकोमा यस वर्ष भने २५ करोड ४६ लाख रुपैयाँको दाबी भुक्तानी गरेको छ । कम्पनीले अझै एक करोड ६० लाख रुपैयाँ भुक्तानी गर्न बाँकी छ ।
नविकरण व्यवसायमा ध्यान दिएकाले प्राइफ लाइफको यस वर्ष अभिकर्ता कमिसन भने घटेको छ । असोज मसान्तसम्ममा कम्पनीको अभिकर्ता कमिशन ११ करोड ३० लाख रुपैयाँ खर्च भएको छ । जवकी गत वर्षको यहि अवधिमा यस्तो खर्च १२ करोड २८ लाख रुपैयाँ थियो ।
यस अवधिमा प्राइफ लाइफले जीवन बीमा कोष २७ प्रतिशतले बढाउन सफल भएको छ । पहिलो तीन महिनाको अवधिमा कम्पनीको जीवन बीमा कोषमा १५ अर्ब ७२ करोड रुपैयाँ जम्मा गर्न सफल भएको छ ।
कम्पनीले आफू सँग भएको अधिकाम्स स्रोतलाई दिर्घकालिन क्षेत्रमा लगानी गरेको छ । दिर्घकालिन कर्जा तथा लगानी १४ अर्ब २८ करोड रुपैयाँ रहेको छ भने अल्पकालिन लगानी तथा कर्जा २ अर्ब ६४ करोड रुपैयाँ रहेको छ । बीमितहरुले बीमालेख धितोमा राखेर एक अर्ब ५९ करोड रुपैयाँ कर्जा लिएका छन् ।
कम्पनीको चुक्ता पूँजी २ अर्ब ४१ करोड रुपैयाँ रहेको छ भने जगेडा कोषमा ८० करोड २९ लाख रुपैयाँ जम्मा भएको छ । अहिलेको मुनाफा अनुसार कम्पनीको प्रतिशेयर आम्दानी २० रुपैयाँ रहेको छ ।
