काठमाडौं । बीमा समितिले दाङ जिल्लाको गढवा गाउँपालिकामा बीमा सम्बन्धि जनचेतनामुलक अन्तर्क्रिया तथा छलफल कार्यक्रम सम्पन्न गरेको छ । समितिका निर्देशक सुशिल देव सुवेदीको अध्यक्षता सम्पन्न भएको कार्यक्रममा गाउँपालिकाको उपाध्यक्ष शान्ति चौधरीको प्रमुख आतिथ्यतामा स्थानीय व्यापारी, व्यवसायी, कृषक लगायत ९० जना भन्दा धेरैको उपस्थिति थियो ।
कार्यक्रमको सञ्चालन उपनिर्देशक कुन्दन सापकोटाले गरेका थिए भने स्वागत मन्तव्य समितिकै सुन्दर प्रसाद शर्माले दिएका थिए । ग्रामिण क्षेत्र भएकाले गाउँपालिका उपाध्यक्ष चौधरी सहित सहभागीहरुले बीमा सम्बन्धी साधारण जानकारीको लागि अनुरोध गरेका थिए । अधिकाम्स सहभागीहरुलाई बीमाको सामान्य जानकारी पनि नभएको पाइएको निर्देशक सुवेदीले जानकारी दिए ।
सहभागीहरुले जीवन बीमा भनेको के हो, निर्जीवन बीमा भनेको के हो, बीमा कसरी गर्ने, जीवन तथा निर्जीवन बीमा गर्दा के फाइदा हुन्छ जस्ता सामान्य प्रश्न गरेका थिए । बीमा समितिका निर्देशक सुवेदीले बीमा सम्बन्धी जानकारी मुलक प्रस्तुती दिए पछि उनिहरुले सुवेदी सँग बीमाका सामान्य भन्दा सामान्य प्रश्न गरेका थिए ।
बीमामा दाबी कसरी गर्ने, को मार्फत गर्ने जस्ता सामान्य प्रकृयाँको कुरा समेत सोधिएकोले यस क्षेत्रमा बीमा सम्बन्धी चेतना सून्य भएको पाइएको छ । सहभागीहरुले धेरै भन्दा धेरै प्रश्न गरे पछि गाउपालिका उपाध्यक्ष चौधरीले बीमा समितिले यस्ता कार्यक्रमलाई निरन्तरता दिन आग्रह गरेकी छिन् । उनले भोलिका दिनमा बीमा सम्बन्धी जानकारी दिदा समितिले सहयोग गर्नु पर्ने भन्दै अनुरोध गरेकी छिन् ।
बीमा समितिले सम्पत्ती बीमालाई गाउँपालिको सेवा सुविधा सँग टाइअप गर्न अनुरोध गरेको थियो । तर गाउँपालिका उपाध्यक्ष चौधरीले यस विषयमा आफ्नो गाउँपालिकामा छलफल गरेर मात्रै अगाडी बढ्ने उल्लेख गरेकी थिइन ।
