काठमाण्डौं । भाटभटेनी सुपर मार्केट टंगालमा अबदेखि फोनपे मार्फत क्यूआर स्क्यान गरेर सामान ग्राहकले किनमेल गर्न सक्ने भएका छन् । यसअघि नगद वा कार्ड मार्फत मात्र भाटभटेनीमा भुक्तानी गर्नुपर्ने बाध्यता रहेकोमा अबदेखि उपभोक्ताले मोबाइलबाटै रकम भुक्तानी गर्न सक्ने भएका हुन् ।
बिहिबार टंगालस्थित भाटभटेनी सुपर मार्केटमा नेपाल राष्ट्र बैंकका गभर्नर महाप्रसाद अधिकारीले एक कार्यक्रमबीच क्यूआर कोड उद्घाटन गरे । भाटभटेनीमा प्रभु बैंक मार्फत क्यूआर स्क्यान राखिएको छ । जुनसुकै बैंकको मोबाइल बैंकिंग एप्स वा ई सेवा मोबाइल एप्सको क्युआर स्क्यान सुविधाको प्रयोग गरेर ग्राहकले किनमेल गर्दा भुक्तानी गर्न सक्ने भएका हुन् ।
भाटभटेनीका अध्यक्ष मिन बहादुर गुरूङले नगदरहित भुक्तानीलाई प्रबद्र्धन गर्दै २ वर्षभित्र कुल कारोबारको ७५ प्रतिशत क्यूआरबाट बनाउने योजना रहेको बताए ।
फोनपेमा हाल ५ लाख २५ हजार भन्दा बढि मर्चेन्ट पुगेका छन् । बैंक तथा वित्तीय संस्था एवं भुृक्तानी सेवा प्रदायकका डेढ करोड बढि मोबाईल बैंकिङ प्रयोगकर्ताले फोनपे मार्फत कारोबार गर्दै आएका छन् । दुई वर्षको अवधिमा फोनपे नेटवर्कमा ६० वटा बैक तथा वित्तीय संस्था आवद्ध छन् ।
