काठमाडौं । विश्व बैंकले चालु आर्थिक वर्षमा नेपालको आर्थिक बृद्धिदर ३.९ प्रतिशतले हुने प्रक्षेपण गरेको छ । गत आर्थिक वर्षमा भने १.८ प्रतिशतले बढेको विश्व बैंकले जनाएको छ । कोभिड १९ का कारण खस्किएको अर्थतन्त्रमा रिकभरी चलिरहेको विश्व बैंकले सार्वजनिक गरेको प्रतिवेदनमा उल्लेख छ ।
खोप लगाउने क्रम बढे सँगै अर्थतन्त्र विस्तारै चलायमान भइरहेको विश्व बैंकले जनाएको छ । नेपाल सँगै दक्षिण एशियाली राष्ट्रकै अर्थतन्त्रमा रिकभरी जारी रहेको तर सबै देशमा समान नभएको विश्व बैंकले उल्लेख गरेको छ ।
रिकभरी जारी रहे पनि कुनै पनि देश विश्वव्यापी महामारी भन्दा पुर्ववत अवस्थामा पुग्न सकेका छैनन् । विश्व बैंकले सार्वजनिक गरेको पछिल्लो अध्ययन अनुसार दक्षिण एशियाको आर्थिक वृद्धिदर ७.१ प्रतिशत रहने अनुमान गरिएको छ । सबैभन्दा धेरै माल्दिभ्सको ११ प्रतिशत हुने विश्व बैंकले जनाएको छ । त्यस्तै भारतको ७.५ प्रतिशतले बृद्धि हुने अनुमान गरिएको छ । दक्षिण एशियाली राष्ट्रहरु मध्ये सबैभन्दा कम पाकिस्तानको ३.४ प्रतिशत हुने अनुमान गरिएको छ ।
