काठमाडौं । अभियान लघुवित्तले कार्तिक १३ गते शनिवार आफ्नो दोस्रो वार्षिक साधारण सभा गर्ने भएको छ । कम्पनीको असोज १६ गते बसेको संचालक समितिको बैंठकले उक्त सभाको मिति तय गरेको हो । सभा पनौति काभ्रेपलाञ्चोकमा बिहान ११ बजे भर्चुअल माध्यमबाट गर्न लागेको जनाएको छ ।
सभामा संचालक समितिको तर्फबाट अध्यक्षले प्रस्तुत गर्ने आर्थिक वर्ष २०७७/७८ को वार्षिक प्रतिवेदन छलफल गरि पारित गर्ने, बाह्य लेखापरीक्षकबाट तयार पारिएको आर्थिक वर्ष २०७७ /७८ को लेखापरिक्षण प्रतिवेदन सहित २०७८ को असार मसान्तसम्मको वासलात, सोही अवधिको नाफा नोक्सान तथा नगद प्रवाह विवरण उपर छलफल गरि पारित गर्ने एजेण्डा छ ।
त्यसैगरी सभामा लेखापरीक्षकको नियुक्ति गरि निजको पारिश्रमिक तोक्ने, प्रबन्धपत्र र नियमावलीमा आवश्यक संशोधन गर्ने र नियामक निकायले थप संशोधनको लागि निर्देशन दिएमा सो को अख्तियारी संचालक समितिलाई दिने लगायतका प्रस्ताव पारित हुनेछ ।
त्यस्तै सभामा सर्बसाधारणलाई छुट्याईएको शेयर (आइपीओ) निष्काशन गर्ने विशेष प्रस्ताव पेश हुने छ । विशेष प्रस्ताव अन्तर्गत नै एक आपसमा मर्जर तथा प्राप्तिमा जाने निर्णय गर्ने, सम्झौता गर्ने, डिडिए गर्ने लगायतका सम्पूर्ण कार्य गर्ने अख्तियारी संचालक समितिलाई दिने लगायतका प्रस्तावहरु पेश गरी पारित हुनेछ ।
