काठमाडौं । बीमा समितिले बूढानीलकण्ड नगरपालिकामा बीमा सम्बन्धी अन्तर्क्रिया तथा छलफल कार्यक्रम सम्पन्न गरेको छ । समितिले स्थानिय तहमा बीमा समिति कार्यक्रम अन्तर्गत हिजो स्थानीय निकायका पदाधिकारीहरु सँग अन्तर्क्रिया गरेको हो ।
कार्यक्रममा नगरपालिकाका मेयर, उपमेयर, जील्ला पशु सेवा विभागका उप महानिर्देशक, वडा अध्यक्ष तथा जननिर्वाचित प्रतिनिधिहरु लगायत सर्वसाधारणको उपस्थिति थियो । छलफल कार्यक्रममा ८० जना भन्दा धेरैको सहभागिता थियो ।
कार्यक्रममा बीमा समितिका निर्देशक सुशिल देव सुवेदीले बीमा सम्बन्धी प्रस्तुतिकरण दिएका थिए । उनले बीमा सम्बन्धी समस्या, समाधानका उपाय, बीमाको हालको अवस्था, बीमामा स्थानीय निकायले खेल्न सक्ने भुमिकाको विषयमा प्रकाश पारेका थिए ।
नगर प्रमुख उद्दव खरेलले बीमा सम्बन्धमा समितिले बीमा कम्पनी र बीमित सबैले मिलेर काम गर्नु पर्ने र बीमा प्रवर्द्धनको लागि स्थानीय तहले सदैव सहयोग गर्ने बताएका थिए । उनले बीमालाई अनिवार्य गर्नु पर्ने धारणा व्यक्त गरेका थिए। समितिका निर्देशक सुवेदीले कार्यक्रममा उठेका विभिन्न प्रश्नहरुको जवाफ दिएका थिए ।
