काठमाडौं । बीमा समितिले बीमा क्षेत्रको विस्तृत अध्ययनका लागि प्रस्ताव आह्वान गर्दा पर्याप्त आवेदन नपरेपछि पुन १५ दिनको म्याद थप गरेको छ । समितले गत साउन २८ गते अध्ययन अनुसन्धानमा क्रियासिल संस्थान प्रतिष्ठानहरुबाट प्राविधिक र आर्थिक प्रस्ताव माग गरेको थियो ।
तर एउटा मात्रै आवेदन परेपछि समितिले आवेदन दिने समय थप गरेको हो । पर्याप्त आवेदन नपरेपछि असोज एक गतेसम्म समय थपिएको छ । प्रयाप्त आवेदन परेका खण्डमा असोज एक गते अपरान्ह ४ बजे नै प्रस्ताव खोलिने समितिले जनाएको छ ।
बीमा क्षेत्रमा अध्ययन गर्ने संघ संस्थाको कमि हुँदा आवेदन पर्न नसकेको हो । बीमा समितिले स्वतन्त्र निकायबाट बीमा क्षेत्रको वास्तविकता थाहा पाउनका लागि यस्तो अध्ययन गराउन लागेको हो । यस्ता निकायले बीमा क्षेत्रमा रहेका कमि कमजोरीलाई औल्याउने हुँदा समितिलाई भावी रणनीति बनाउन पनि सजिलो हुनेछ ।