काठमाडौं । राष्ट्रिय बीमा कम्पनीको आम्दानीमा गिरावट सँगै मुनाफा ४३.५७ प्रतिशतले घटेको छ । गत आर्थिक वर्ष २०७७/७८ मा कम्पनीको समग्र आम्दानी नै ३५.६५ प्रतिशतले घटेको छ । बैंक तथा वित्तीय संस्थाले व्याजदर घटाउदा त्यसकै सबैभन्दा ठुलो असर राष्ट्रिय बीमा कम्पनीमा देखिएको हो ।
कम्पनीले गत आर्थिक वर्षमा ३६ करोड तीन लाख रुपैयाँ मुनाफा आर्जन गरेको छ । अघिल्लो वर्षमा कम्पनीले ६३ करोड ८५ लाख रुपैयाँ मुनाफा आर्जन गरेको थियो । मुनाफामा गिरावट देखिए पनि खुद बीमा शुल्क आर्जन भने १.०७ प्रतिशतले सुधार भएको छ । यस अवधिमा कम्पनीले २२ करोड ६९ लाख रुपैयाँ बीमा शुल्क आर्जन गरेको छ ।
त्यस्तै दाबी भुक्तानी पनि २९ प्रतिशतले घटेको छ । कम्पनीले ४ करोड २५ लाख रुपैयाँ दाबी भुक्तानी गरेको छ ।
कम्पनीको चुक्ता पूँजी २६ करोड ६६ लाख रुपैयाँ छ । जगेडा कोष थप ६.०६ प्रतिशतले बढेर तीन अर्ब १४ करोड रुपैयाँ जम्मा भएको छ । त्यस्तै बीमा कोषमा पनि ८ प्रतिशतले बढेर २ अर्ब ४३ करोड रुपैयाँ छ । दिर्घकालिन लगानी तथा कर्जा एक अर्ब ४२ करोड रुपैयाँ छ । अल्पकालिन लगानी ४ अर्ब ६५ करोड रुपैयाँ छ । प्रतिशेयर आम्दानी १३५ रुपैयाँ रहेको कम्पनीको प्रतिशेयर नेटवर्थ भने १२८० रुपैयाँ छ ।
