काठमाडौं । जनरल इन्स्योरेन्स कम्पनी लिमिटेडको प्रमुख कार्यकारी अधिकृतमा राम चन्द्र श्रेष्ठ नियुक्त भएका छन् । कम्पनीको साउन १२ गते मंगलबार बसेको संचालक समितिको बैठकले उक्त पदमा श्रेष्ठलाई नियुक्त गरेको हो ।
बीमा समितिले श्रेष्ठलाई जनरल इन्स्योरेन्सको सिइओ बनाउनका लागि साउन ८ गते नियामकिय स्वीकृति प्रदान गरेको हो । बीमा क्षेत्रमा ३३ वर्षको अनुभव भएका श्रेष्ठले २०४५ साल कात्तिकदेखि राष्ट्रिय बीमा संस्थानबाट जागिर सुरु गरेका थिए ।
त्रिचन्द्र कलेजबाट विएससी गरेका श्रेष्ठले व्यवस्थापनमा एमबिए गरेका छन् । तीन दशक भन्दा लामो समय बीमा क्षेत्रमा काम गर्दा उच्च व्यवस्थापन र अनुसन्धानमा मात्रै दुई दशक विताएका छन् ।
श्रेष्ठले सर्भेयर भएर पनि लामो समय काम गरे । सगरमाथा इन्स्योरेन्सको स्थापना कालमा काम गरेका श्रेष्ठले एनवि इन्स्योरेन्स कम्पनीमा पनि काम गरे । एनवि सँगै साविक एलाइन्स हालको प्रभु इन्स्योरेन्स कम्पनीमा पनि काम गरेका थिए । उनी लुम्बिनी जनरल इन्स्योरेन्स कम्पनीको डिसिओ भएर ९ वर्ष काम गरेका श्रेष्ठ गत चैतमा जनरल इन्स्योरेन्स कम्पनीमा आवद्ध भएका थिए ।
