काठमाडौं । सरमाथा इन्स्योरेन्स कम्पनीका प्रमुख कार्यकारी अधिकृत चंकी क्षेत्रीले एक वर्षमा तलब भत्ता तथा अन्य सुविधा बापत ४७ लाख ३४ हजार २८८ रुपैयाँ बुझेका छन् । यस बाहेक उनले नियम अनुसार आर्थिक वर्ष २०७६/७७ को मुनाफाबाट बोनस रकम, इन्सेन्टिभ तथा विभिन्न सुविधाहरु प्राप्त गरेको कम्पनीले जनाएको छ ।
क्षेत्रीको अघिल्लो आर्थिक वर्ष २०७५/७६ को भन्दा तलब सुविधा घटेको छ । अघिल्लो आर्थिक वर्षमा उनले ५१ लाख ८३ हजार ३३८ रुपैयाँ बुझेका थिए । प्रमुख कार्यकारी अधिकृत करारमा नियुक्ति गरिने भएकाले तलब निस्चित हुन्छ तर अन्य सुविधाका कारणले बोझिलिने रकममा भने फरक पर्न जान्छ ।
त्यस्तै सञ्चालक समितिले पनि गत आर्थिक वर्षमा बैठक भत्ता बापत ५ लाख ९८ हजार रुपैयाँ बुझेका छन् । लेखा तथा अन्य समितिका पदाधिकारीहरुले ४ लाख २४ हजार रुपैयाँ भत्ता प्राप्त गरेको कम्पनीले जनाएको छ । यस बाहेक सञ्चालकहरुका लागि पत्रपत्रिका तथा इमेल बापत ६ लाख ९६ हजार रुपैयाँ खर्च भएको लेखापरिक्षण प्रतिवेदनमा उल्लेख छ । सञ्चालक समितिका पदाधिकारीहरुलाई भत्ता तथा अन्य सुविधा दिए बापत १७ लाख १८ हजार रुपैयाँ खर्च भएको देखिन्छ ।
