काठमाडौं । बैंकर्स संघले आगामी आर्थिक वर्ष २०७८/७९ को मौद्रिक नीतिमा पुनः बैंकासुरेन्सको सेवा समावेश गर्न सुझाव दिएको छ । संघले नेपाल राष्ट्र बैंकलाई सुझाव पेश गर्ने क्रममा बीमाको दायरा बढाउनका लागि व्यवस्थित रुपमा बैंकासुरेन्सको व्यवस्थाका लागि माग गरेको हो ।
सर्वसाधारणमा बीमाको दायरा बढाउन बैंक तथा वित्तीय संस्थाले बीमा कम्पनीसँगको सहकार्यमा आफ्ना ग्राहकहरुलाई बीमा पोलिसी विक्री गर्न पाउने प्रावधानलाई व्यवस्थित बनाई लागू गर्न सुझाव दिएको हो ।
बैंकहरुले बैंकासुरेन्स सेवा प्रदान गर्दा मुलुकको ७५० स्थानीय तहमा वाणिज्य बैंकहरुको पहुँच भएको अवस्थामा ग्राहकहरुले सहज र सरल रुपमा दुर–दराजमा समेत सेवा पाउने र यसले बीमाको दायरा बढाउन मद्दत गर्ने संघको धारणा छ ।
बैंकहरुले आफ्ना ऋणीलाई जवजस्ती बीमा पोलिसी बिक्री गर्न थाले पछि गएको वर्ष बैंकासुरेन्स बन्द गरेको थियो । बीमा समितिले बैंकहरुलाई पोलिसी बिक्री गर्न पाउने बाटो खोलिदिए पनि बैंकहरुले यसको दुरुपयोग गरेको भन्दै बन्द गरिदिएको हो । तर संघले यसलाई थप व्यवस्थित गरिदिन आग्रह गरेको छ ।
