काठमाडौं । अभिकर्ताको नयाँ लाइसेन्स लिन तथा नविकरणका लागि बीमा समितिमा धाउनु नपर्ने भएको छ । बीमा समितिले अभिकर्ताको नयाँ लाइसेन्स तथा नविकरणको लागि अनलाइन माध्यमको विकास गरेको छ । समितिले एक दुई दिन भित्रै उक्त सफ्टवेयर लन्च गर्ने तयारी गरेको हो ।
सम्पुर्ण बीमा कम्पनीहरुले अभिकर्ताको लाइसेन्सका लागि बीमा समितिमा जानुपर्ने अवस्था रहेको छ । अभिकर्ताको लाइसेन्सका लागि कम्पनीहरुले समितिमै पुगेर पुर्ण विवरण पेश गर्ने र समितिबाट स्वीकृति प्राप्त गर्ने गरेका छन् । अवदेखि यो काम उनिहरुले समितिले तयार पारेको सफ्टवेयर मार्फत गर्न सक्ने छन् ।
अहिलेका लागि नयाँ लाइसेन्स लिन मात्रै मिल्ने भएता पनि केहि समय पछि नविकरण शुल्क पनि अनलाइन माध्यमबाटै भुक्तानी गर्न मिल्ने व्यवस्था मिलाउने तयारी भइरहेको समितिले जनाएको छ । अभिकर्ताको लाइसेन्स लिने क्रममा बीमा कम्पनीहरुलाई समितिमा उपस्थित हुन नपरो भनेर सफ्टवेयरको निर्माण गरिएको समितिका कार्यकारी निर्देशक राजुरमण पौडेलले जानकारी दिए । उनले भने ‘सफ्टवेयर निर्माण कार्य सकिएको छ । समितिका अध्यक्षले एक पटक हेरेर अगाडी बढाउने निर्देशन दिन मात्रै बाँकी रहेको छ ।’
त्यस्तै नविकरणका लागि पनि समितिले एसएमएस प्रणालीको विकास गर्ने भएको छ । सफ्टवेयरबाटै एसएमसबाट जानकारी दिने गरि प्रणालीको विकास गर्न लागिएको पौडेलले बताए । त्यस्तै नयाँ वर्षदेखि नविकरण शुल्क भुक्तानीका लागि पनि डिजिटल प्रणाली सँग जोडेर जाने व्यवस्थाका लागि काम भैरहेको कार्यकारी निर्देशक पौडेलले जानकारी दिए । कोभिड १९ को संक्रमण थप बढ्न थाले पछि समितिले दिने सबै सुविधालाई विस्तारै डिजिटल बनाउने गरि काम भैरहेको सिलवालले जानकारी दिए ।
