काठमाडौं । अजोड इन्स्योरेन्स कम्पनीले बैशाख ७ गते तेस्रो वार्षिक साधारणसभा डाकेको छ । कम्पनीले साधारणसभामा चुक्ता पूँजीको ५० प्रतिशत हकप्रद शेयर निष्काशन गर्ने विशेष प्रस्ताव लैजाने भएको छ । कम्पनीले यसै वर्ष सर्वसाधारणका लागि प्राथमिक शेयर जारी गरेको थियो ।
कम्पनीको हालको चुक्ता पुँजी एक अर्ब रुपैयाँ रहेको छ । प्रस्तावित हकप्रद पछि कम्पनीको चुक्ता पूँजी एक अर्ब ५० करोड रुपैया पुग्नेछ । साधारणसभामा सर्वसाधारण समुहबाट दुई जना सञ्चालकको निर्वाचन गर्ने कार्यक्रम रहेको छ ।
साधारणसभामा सञ्चालक समितिको तर्फबाट अध्यक्षले आर्थिक वर्ष २०७६/७७ को लेखापरिक्षण प्रतिवेदन पेश गर्ने छन् । त्यस्तै साधारणसभामा लेखापरिक्षण प्रतिवेदन पारित गर्ने कार्यक्रम रहेको छ । साधारणसभा प्रयोजनका लागि चैत २४ गतेदेखि बुक क्लोज हुनेछ । चैत २३ गतेसम्म कायम शेयरधनीले साधारणसभामा भाग लिन पाउनुका साथै सञ्चालक समितिको निर्वाचनमा सहभागिता हुन पाउने छन् ।
कोभिड १९ को बढ्दो संक्रमणका कारण जुम मिटिङबाट साधारणसभा गर्ने भएको छ । साधारणसभा वल्ड ट्रेड सेन्टरको अमन हलबाट हुने छ ।
