काठमाडौं । कोरोना बीमामाथि परेको ठूलो दावी सेटलमेन्ट गर्ने काम तीव्र गतिमा अघि बढिरहेको छ । बीमा समितिमा प्राप्त हिजो साँझ सम्मको तथ्याङ्क अनुसार २६ हजार ५९७ जनाको फाइल बीमा पुलमा पुगेको छ । सो मध्ये १४ हजार १८४ जनाले बीमा रकम प्राप्त गरेका छन् । बीमा समितिका अनुसार हालसम्म एक अर्ब ३८ करोड ४८ लाख ७५ हजार रुपैयाँ दावी भुक्तानी कम्पनीहरुले दिइसकेका छन् ।
त्यस्तै, झण्डै दुई हजार जनाको फाइल कागजात नपुगेको भन्दै सम्बन्धित कम्पनीमै फिर्ता पठाइएको छ । बीमा पुलले पठाएको तथ्याङ्क अनुसार एक हजार ८९२ वटा फाईल बुधबारसम्ममा कम्पनीमै फिर्ता पठाइएको हो । फिर्ता पठाइएका फाइलहरुको आवश्यक कागजात पुरा गरेर पुनः पेश गर्न भनिएको छ ।
उता, दोहोरो बीमा दावी गर्ने ७२ जनाको फाईल बीमा दावी भुक्तानी नपाउने गरी फाईल क्लोज गरिएको छ । उनीहरुले दावी भुक्तानीको लागि एउटा कम्पनीबाट कागजात पेश गरिसकेको अवस्थामा पुनः दोस्रो पटक पनि दावी भुक्तानीको लागि कागजात पेश गरेकोले दावी भुक्तानी नदिने निर्णय गरिएको बीमा समितिले जनाएको छ ।
तथ्याङ्क अनुसार तीन हजार १११ वटा फाईल स्वास्थ्ये सेवा विभाग अन्तर्गत इपिडिमियोलोजी तथा सरुवा रोग नियन्त्रण महाशाखामा रोकिएको छ । त्यहाँ प्रमाणिकरण हुन नसकेपछि रोकिएका हुन् ।
