काठमाडौं । चालु आर्थिक वर्षको प्रथम त्रैमाससम्मा नेपालमा सञ्चालनमा रहेका १९ जीवन बीमा कम्पनीहरुको जीवन बीमा कोषमा तीन खर्ब २१ अर्ब संचिती गर्न सफल भएका छन् । कोरोना महामारीका बीचमा बीमा कम्पनीहरुले गत वर्षको तुलनामा झण्डै ३० प्रतिशतले जीवन बीमा कोष बृद्धि गर्न सफल भएको कम्पनीले प्रकाशन गरेको वित्तीय विवरणमा झल्किएको छ ।
गत आर्थिक बर्षको सोहि अवधिमा जीवन बीमा कम्पनीहरुले २ अर्ब ४७ करोड रुपैयाँ जीवन बीमा कोषमा रकम संचित गरेका थिए । गत आर्थिक बर्षको तुलनामा जीवन बीमा कम्पनीहरुको बीमा कोषको आकार २९ दशमलव ६८ प्रतिशतले बढेको छ । जीवन बीमा कम्पनीहरुको लागि जीवन बीमा कोषलाई निकै महत्वपूर्ण कोषको रुपमा लिईन्छ ।
जीवन बीमा कोषलाई आधार मान्दा नेपाल लाइफ इन्स्योरेन्स कम्पनीको जीवन बीमा कोष सबै भन्दा ठूलो छ । नेपाल लाईफको जीवन बीमा कोषमा ९४ अर्ब ८२ करोड छ । गत आर्थिक बर्षको सोहि अवधिमा कम्पनीको जीवन बीमा कोषमा ७२ अर्ब ३३ करोड रुपैयाँ रकम संचित रहेको थियो । गत आर्थिक बर्षको तुलनामा कम्पनीको जीवन बीमा कोष ३१ प्रतिशतले बढेको देखिएको छ ।
एलआईसी नेपालको जीवन बीमा कोष २२ प्रतिशतले बढेर ७० अर्ब ७३ करोड रुपैयाँ पुगेको छ । गत अर्थिक बर्षको सोहि अवधिमा कम्पनीको जीवन बीमा कोषमा ५७ अर्ब ८० करोड रुपैयाँ संचित रहेको थियो । त्यस्तै, नेशनल लाइफको जीवन बीमा कोष २५ प्रतिशतले बढेर ३५ अर्ब ९४ करोड रुपैयाँ पुगेको छ । गत आर्थिक बर्षको सोहि अवधिमा कम्पनीको जीवन बीमा कोषमा २८ अर्ब ६४ करोड रुपैयाँ रहेको छ ।
जीवन बीमा कम्पनीहरुले कोरोना महामारीका बीचमा पनि जीवन बीमा कोषमा गर्ने संचितीमा उल्लेख्य मात्रामा बृद्धि गर्न सफ हुनुले कोभिड–१९ को महामारीले जीवन बीमा क्षेत्रमा खासै ठूलो असर नपरेको देखिएको छ । अझ जीवन बीमा कम्पनीहरुले कोरोनाको महामारीमा सरकारले घोषणा गरेको लकडाउन, निषेधाज्ञाका बीचमा उत्कृष्ट व्यवसाय गर्न सफल भएको देखिएको छ ।