काठमाडौं । गुराँस लाइफ इन्स्योरेन्स कम्पनी लिमिटेडले आफ्नो दशौँ वार्षिक साधारण सभा मंसिर ४ गते बिहीबार गर्ने भएको छ । कम्पनीको कार्तिक ३ गते सोमबार बसेको सञ्चालक समितिको बैठकले उक्त सभाको मिति तय गरेको कम्पनीले जनाउको छ । सभा कम्पनीको प्रधान कार्यालय राज भवन तिनकुने, काठमाडौँमा बिहान १०ः३० बजेबाट सुरु हुने कम्पनीले बताएको छ ।
सभामा कम्पनीको भाद्र १९ गते बसेको सञ्चालक समितिको बैठकले निर्णय गरेअनुसार आर्थिक वर्ष २०७४/७५ को मुनाफबाट कम्पनीका शेयरधनीहरूलाई १० दशमलव ५० प्रतिशत बोनस शेयर वितरण गर्ने र सो बोनश शेयरमा लाग्ने कर प्रयोजनका लागि नगद लाभांश वितरण गरिने विशेष प्रस्ताव रहेको छ ।
सभामा कम्पनीको सञ्चालक समितिको तर्फबाट अध्यक्षद्वारा आर्थिक वर्ष २०७५/७६ को वार्षिक प्रतिवेदनबारे छलफल गरी पारित गरिनेछ । त्यस्तै, कम्पनीको आर्थिक वर्ष २०७५/७६ को लेखापरीक्षण प्रतिवेदन, वासलात, नाफा नोक्सान हिसाब र सोहि अवधिको नगद प्रवाह विवरण लगायतका वित्तिय विवरणहरू छलफल गरी पारित गर्ने एजेण्डा रहेको छ ।
त्यस्तै, सभामा आर्थिक वर्ष २०७६/७७ को लागि लेखापरीक्षक नियुक्ती गरी पारिश्रमिक पनि तोकिनेछ ।
साधारण सभा तथा लाभांश वितरण प्रयोजनका लागि कम्पनीले कार्तिक २० गतेबाट मंसिर ४ गतेसम्म शेयरधनी दर्ता पुस्तिका बन्द गर्नेछ । त्यसैले, कार्तिक १९ गतेसम्म नेप्सेमा कारोबार भई कायम शेयरधनीहरुले मात्र साधारण सभामा भाग लिन तथा लाभांश प्राप्त गर्न सक्नेछन् ।
