काठमाडौं । मन्त्री सरहको सुविधा सहित प्रधानमन्त्री कार्यालयका आर्थिक सल्लाहकारमा नियुक्त भएका निवर्तमान अर्थमन्त्री डा. युवराज खतिवडा अमेरिकाको लागि नेपाली राजदूत बन्ने भएका छन् ।
आज विहान बसेको मन्त्रिपरिषदको बैठकले सो निर्णय गरेको हो । यससँगै उनी प्रधानमन्त्री केपी शर्मा ओलीको विशेष आर्थिक सल्लाहकारबाट हटेका छन् । अब नेपालको अर्थतन्त्र डा. खतिवडाको छायाँबाट पूर्ण रुपमा मुक्त हुने भएको छ । प्रधानमन्त्री केपी शर्मा ओलीले मन्त्रिपरिषद विस्तार गर्नु अघि मुख्य सचिव परिवर्तन तथा पूर्व अर्थमन्त्रीलाई विशेष सल्लाहकारबाट राजदूत बनाउने निर्णय गरेका हुन् ।
आज विहान बसेको मन्त्रिपरिषदको बैठकले मुख्य सचिवमा शंकरदास बैरागीलाई नियुक्त गर्ने निर्णय गरेको छ । त्यस्तै, हालका मुख्य सचिव लोकदर्शन रेग्मीलाई बेलायतको राजदूत बनाउने निर्णय गरेको छ । आज विहान बसेको मन्त्रिपरिषदको सो निर्णय औपचारिक रुपमा भने सार्वजनिक भइसकेको छैन ।
डा. खतिवडालाई अमेरिकाको लागि राजदूतमा नियुक्त गरेपनि उनी नियुक्त भई त्यहाँ जान भने केही समय लाग्ने छ । संसदीय सुनुवाई लगायतको प्रक्रिया पूरा गरेपछि डा. खतिवडाको अमेरिकाको लागि राजदूतको यात्रा तय हुनेछ ।
