काठमाडौं । बीमा समितिले आफैले जारी गरेको संस्थागत सुशासन सम्बन्धी निर्देशिका २०७५ को मूल भाव विपरित हुने गरी शिखर इन्स्योरेन्स कम्पनीको प्रमुख कार्यकारी अधिकृत (सीईओ)मा दीपप्रकाश पाण्डेले निरन्तरता दिने निर्णय गरेको छ । बीमा समितिबाट २०६९ सालमा जारी गरिएको संस्थागत सुशासन निर्देशिका पटक पटक संशोधन गर्दै अन्तिम पटक २०७५ मा जारी गरेको थियो । पछिल्लो पटक जारी संस्थागत सुशासनको फरक व्याख्या गरी शिखर इन्स्योरेन्सको सिईओमा पाण्डेलाई पुनः नियुक्तीका लागि आज अनुमति दिएको हो । यसअघि २०७३ फागुन २७ गते पाण्डेलाई अन्तिम पटकका लागि भनेर नियुक्ती दिएको थियो ।
बीमा समितिले आज शिखर इन्स्योरेन्सको सिईओ नियुक्ती सम्बन्धी फाईल स्वीकृत गर्ने निर्णय गरेको स्रोतले जनाएको छ । बीमा समितिले अनुमति दिएसँगै अब शिखर इन्स्योरेन्सको सञ्चालक समितिले पाण्डेलाई सिईओ नियुक्ती गर्ने बाटो खुलेको छ । उनको चार वर्षे कार्यकाल आगामी कार्तिक ११ गतेदेखि सुरु हुनेछ ।
