काठमाडौं । आर्थिक वर्ष ७६/७७ को चौथो त्रैमासमा नबिल बैंकको खुद नाफा १५ दशमलव ८६ प्रतिशतले घटेको छ । आर्थिक वर्ष ७५/७६ को सोही अवधिमा ४ अर्ब २३ करोड नाफा कमाएको नबिलको नाफा गत आर्थिक वर्षमा घटेर ३ अर्ब ५६ करोड कायम भएको हो ।
१० अर्ब ९ करोड चुक्ता पुँजी भएको बैंकको रिजर्भमा १५ अर्ब ७० करोड रहेको छ । यस अवधिमा बैंकको वितरणयोग्य मुनाफा ३ अर्ब ४ करोड रहेको छ ।
यस अवधिमा बैंकको संचालन मुनाफा पनि १५ दशमलव ४८ प्रतिशतले घटेर ५ अर्ब ९ करोड रहेको छ । बैंकको खुद ब्याज आम्दानी १ दशमलव ९४ प्रतिशतले बढेर ७ अर्ब २ करोड पुगेको छ । त्यस्तै बैंकको निक्षेप १७ प्रतिशतले बढेर १ खर्ब ९० अर्ब पुगेको छ भने कर्जा प्रवाह १६ प्रतिशतले बढेर १ खर्ब ४८ अर्ब पुगेको छ ।
बैंकको खराब कर्जा ०।७४ प्रतिशतबाट बढेर ० दशमलव ९७ पुगेको छ । बैंकको प्रति शेयर आम्दानी ३५ रुपैयाँ ३२ पैसा , प्रति शेयर नेट वर्थ २५५ रुपैयाँ ५२ पैसा , मूल्य आम्दानी अनुपात २१।६६ गुणा रहेको छ ।
