काठमाडौं । बीमा समितिले देशका ४० वटै बीमा कम्पनीहरुमा अनुगमन सुरु गरेको छ । हिजोदेखि सुरु भएको अनुगमन आज साँझसम्म सकिने बीमा समितिले जनाएको छ । बीमा समितिको अनुगमन शाखाका १५ जना र अन्य शाखाबाट थप १५ जना कर्मचारीसहित कूल ३० जनाको टोली बीमा कम्पनीहरु अनुगमनमा खटिएका छन् ।
समितिका अनुसार हिजो साँझसम्म ३० वटा बीमा कम्पनीहरुको अनुगमन सकिएको छ । हिजो १९ वटै जीवन बीमा कम्पनीहरु मध्ये अधिकांशको सकिएको छ भने निर्जिवन बीमा कम्पनीहरुको अनुगमन बाँकी छ ।
बीमा समितिको अनुगमन तथा सुपरिवेक्षण विभागले समयमा क्लोजिङ सम्पन्न गरे नगरेको लगायतका विषयहरुमा अनुगमन गरेको बीमा समितिका उप निर्देशक निर्मल अधिकारीले बताए । आर्थिक वर्र्ष क्लोजिङ सकिएकोले सो अनुसार हिसाब किताब क्लोजिङ गरे नगरेको विषयलाई केन्द्रमा राखेर अनुगमन गरिएको जनाइएको छ । बीमा समितिका टोली हिजो राति ८ बजेसम्म बीमा कम्पनीमा बसेर आवश्यक कागजात हेरेको एक बीमा कम्पनीका अधिकारीले बताए ।
३० जनाको टोलीले हिजो दुई वटा कम्पनीका दरले अनुगमन गरेको छ । पुनर्बीमा कम्पनीसहित बाँकी १० वटा कम्पनीको अनुगमन आज हुनेछ । अनुगमन सकिएपछि टोलीले समिति समक्ष प्रतिवेदन बुझाउने छ ।
