काठमाडौं । चालु आर्थिक बर्ष २०७६/७७ मा नयाँ बीमा कम्पनीहरुको प्राथमिक शेयर निष्काशन हुने सम्भावना टरेको छ । कम्पनीहरुको साधारण सभा नै हुन नसकेपछि आईपिओ जारी हुने सम्भावना टरेको हो ।
तीन बर्ष अगाडी दश वटा नयाँ जीवन बीमा कम्पनी र तीन वटा निर्जीवन बीमा कम्पनीले बीमा समितिबाट सञ्चालन अनुमति पाएका थिए । गत आवमा महालक्ष्मी लाईफ इन्स्योरेन्स कम्पनीले बीमा समितिबाट सञ्चालन अनुमति पाएको थियो । कम्पनीहरुलाई अनिवार्य रुपमा ३० प्रतिशत प्राथमिक शेयर निष्काशन गर्नुपर्ने प्रावधान छ । सोही बमोजिम गत आवमा नै केही कम्पनीहरुले आईपिओ जारी गर्न तयारी गरेका थिए । तर, कम्पनीहरु सञ्चालनको एउटा आर्थिक बर्ष पुरा नभएका कारण धितोपत्र बोर्डले आईपिओ जारी गर्न रोक लगाएको थियो ।
चालु आवमा भने कम्पनीहरुलाई आईपिओ जारी गर्न छुट छ । तर, कम्पनीहरुले समयमा साधारण सभा गर्न नपाउँदा आईपिओ जारी गर्न पाएका छैनन् । गत आ.व. देखि बीमा समितिले एनएफआरएस वित्तीय प्रणाली लागू गरेका कारण कम्पनीहरुले समयमा नै विवरण बुझाउँन पाएका छैनन् । फलस्वरुप साधारण सभामा ढिलाई भएको हो । जसका कारण कम्पनीहरुले यो बर्ष आईपिओ जारी गर्न नपाउँने भएका छन् ।
अजोड इन्स्योरेन्सको भने धितोपत्र बोर्डमा पाइपलाइनमा भएता पनि यो आर्थिक वर्ष आईपिओ जारी हुने सम्भावना छैन।
