काठमाडौं । विश्वव्यापी रुपमा फैलिरहेको कोरोना भाइरसविरुद्ध सुरु गरिएको कोरोना बीमाको कारोबार एक करोड नाघेको छ । एक सातामै कोरोना बीमाको कारोबार एक करोड नाघेको हो । न्यून आय भएकाहरुलाई समेत समेट्ने ल्याइएको कोरोना बीमा (कोभिड–१९) पोलिसी मार्फत निर्जिवन बीमा कम्पनीहरुले करोड भन्दा बढी बीमाशुल्क आर्जन गर्न सफल भएका छन् । हाल संचालनमा रहेको २० वटा निर्जिवन बीमा कम्पनीहरुले उक्त रकम बराबरको प्रिमियम भित्रयाएको हो ।
नेपाल बीमंक संघको तथ्याङ्क अनुसार ११ दिनसम्म निर्जिवन बीमा कम्पनीहरुले १ हजार ६ सय ४४ वटा कोरोना बीमा पोलिसी बिक्रि गरिसकेको छ । हालसम्म २१ हजार ६ सय ३० जना बीमितको रक्षावरण गरिएको बीमक संघले जनाएको छ ।
अधिकांश बैंक, कर्पोरेट कम्पनी र अस्पतालहरुले आफनो कर्मचारीको सामूहिक रुपमा बीमा गराएका छन् । कोरोना बीमाप्रति बीमितहरुको आकर्षण बढ्दै गएको कम्पनीका अधिकारीहरुको भनाई छ ।
बीमा समितिले बीमा योजना औपचारिक रुपमा सुरुवात गरेको दुई साता नबित्दै बीमा कम्पनीहरुले एक अर्ब माथिको बीमा शुल्क भित्रयाईसकेको छ । समितिबाट कर्मचारीहरुको सामुहिक रुपमा कोरोना बीमा लिएर सुरुवात गरेको यस बीमा योजनामा सामुहिक रुपमा बीमा गराउने क्रम बढ्दै गएको देखिन्छ ।
समितिले यस बीमा योजनाको लागि निर्जिवन बीमा कम्पनीहरुलाई जिल्ला तोकेरै अभियानमा रुपमा बीमा योजना अघि बढाउन निर्देशन दिए अनुसार बीमा कम्पनीहरु परिचालिन भएपछि बीमाको कारोबार तीव्र भएको हो ।
