काठमाडौं । नेप्सेले धितोपत्र बोर्डको आदेशको आधारमा आजसम्मका लागि बन्द गरेको शेयर बजार आजै अर्को निर्णय नभए भोलिबाट खुल्नेछ । तर, धितोपत्र बोर्डले आजै थप निर्णय गरेर शेयर कारोबार बन्दलाई लकडाउनसँगै लम्व्याउने तयारी गरेको छ ।
त्यसो त आइतबार नै शेयर कारोबार बन्द गर्ने विषयमा टुंग्याउने भनिए पनि सरकारले लकडाउन गर्ने निर्णय राति अबेर मात्रै गरेकोले बोर्डले आज निर्णय गर्न लागेको हो ।
धितोपत्र बोर्डका कार्यकारी निर्देशक निरज गिरीले लकडाउन अवधीभर शेयर कारोबार गर्ने स्थिति नभएको भन्दै आजै थप निर्णय गर्न लागिएको जानकारी दिए । नेपालको शेयर कारोबार अनलाईनबाट नहुने र शेयर ब्रोकरको कार्यालय खोल्ने अवस्था नरहेकाले बोर्डले लकडाउन अवधीभर शेयर कारोबार बन्द गर्न निर्णय गर्ने सम्भावना रहेको गिरीले बताए ।
