काठमाडौं । लामो समयदेखि रोकिरहेको बीमा प्राधिकरण सम्बन्धी विधेयक सोमबारदेखि संसदको अर्थसमितिमा प्रवेश गर्ने भएको छ । बीमा क्षेत्रलाई नियमन गर्न अघि बढाइएको बीमा प्राधिकरण सम्बन्धी विधेयक सोमबार बस्ने समितिको बैठकमा छलफलमा पेश हुने र बाँकी छलफल आगामी साता हुने अर्थ समितिले जनाएको छ ।
आर्थिक बर्ष २०७५ असार २७ गते बीमा प्राधिकरण बिधेयक संसदमा दर्ता भएको थियो । संसदमा दर्ता भएको लामो समयसम्म अघि बढ्न नसकेको विधेयक अब अघि बढाइएको अर्थ समितिका सभापति कृष्ण प्रसाद दाहालले इन्स्योरेन्स खवरलाई बताए । बीमा समितिले आफूखुशी थपघट गर्ने प्रयास गरेको हुँदा अर्थमन्त्रालयले रोकेको बताइन्छ । बीमा प्राधिकरण सम्बन्धी विधेयकमा अहिलेको बीमा समितिलाई पुनर्संरचना गर्ने प्रस्ताव गरिएको छ ।
