काठमाडौं । कम्पनी ऐन २०६३ बमोजिम दर्ता भएका जुनसुकै प्रकारका कम्पनीहरुको अघिल्लो आर्थिक वर्षको बार्षिक साधारणसभा हरेक पुस मसान्तभित्रका गर्नुपर्ने नियम छ । तर, नेपालमा बीमाको कारोबार गर्दै आएका ३९ वटा बीमा कम्पनी मध्ये ३८ वटा बीमा कम्पनीका गत आर्थिक वर्षको साधारणसभा पुस मसान्तभित्र नहुने निश्चित भएको छ ।
अजोड इन्स्योरेन्स कम्पनीले आर्थिक वर्ष २०७५/०७६ को बार्षिक साधारणसभा भोलि शुक्रबार हुँदैछ । कूल ३९ वटा बीमा कम्पनी मध्ये एक मात्र कम्पनीले कम्पनी ऐन २०६३ बमोजिमको तोकिएको समयभित्र साधारणसभा गर्न सफल भएको छ ।
साधारणसभा नगर्ने कम्पनीहरुमा १९ वटा निर्जिवन बीमा कम्पनी छन् भने १९ वटै जीवन बीमा कम्पनीहरु छन् । बीमा कम्पनीहरुको बीमाङ्कीय मूल्याङ्कनमा समय लाग्ने हुँदा साधारणसभा ढिलाई हुने गरेको बीमा कम्पनीहरुको गुनासो छ । बीमाङ्कीय मूल्याङ्कनको बाहानामा केही बीमा कम्पनीहरुले दुई आर्थिक वर्ष पुरानो साधारणसभा गर्न बाँकी छ ।
