काठमाडौं । नेपालको दक्षिणी सीमा क्षेत्रमा भारतीय बीमा कम्पनीको प्रभाव रोक्ने अभियान चलाउन अर्थमन्त्रालयबाट निर्देशन पाएपछि जनचेतना अभियान बनाएको बीमा समितिले शनिबार रुपन्देही जिल्लाको सुनौली नाकामा नयाँ होर्डिङबोर्ड राखेको छ ।
मध्यपूर्वी महोत्तरीको भिट्टामोडबाट सुरु गरेको होर्डिङ बोर्ड अभियान पर्साको बीरगन्जपछि सुनौलीमा राखिएको हो । सीमा क्षेत्रमा भारतीय बीमा कम्पनी सक्रिय भएको रिपोर्ट अर्थमन्त्रालय पुगेपछि गत असोजमा बसेको बित्तीय क्षेत्र समन्वय समितिको बैठकले सीमा क्षेत्रमा होर्डिङ बोर्ड राख्न बीमा समितिलाई निर्देशन दिएको थियो ।
शनिबार देशकै दोस्रो ठूलो भन्सार भैरहवा नजिकै सुनौली नाकामा विदेशी कम्पनीमा बीमा नगरौं भन्दै सन्देशसहितको होर्डिङ बोर्ड राखिएको हो । बीमा समितिका अध्यक्ष चिरन्जिवी चापागाँईले उद्घाटन गरेको नयाँ होर्डिङ बोर्डमा विदेशस्थित विदेशी कम्पनीमा बीमा गर्नु कानुन विपरित भएको जानकारी दिइएको छ । नेपालस्थित बीमा समितिबाट अनुमति प्राप्त बीमा कम्पनीमा बीमा गरौं भन्ने सन्देश सहितको होर्डिङ बोर्डले सीमा क्षेत्रमा भारतीय बीमा कम्पनीको प्रभाव घट्ने विश्वास समितिका अध्यक्ष चापागाँईले बताए ।
सीमा क्षेत्रमा होर्डिङ राख्ने अभियान चलाएको बीमा समितिले आगामी दिनमा पूर्वी नेपालको काँकडभिट्टा, सुदुरपश्चिमको महेन्द्रनगरमा पनि होर्डिङ बोर्ड राख्ने तयारी गरेको छ । यी क्षेत्रमा नेपालमा दर्ता नभएका विदेशी कम्पनीले बीमा बजारिकरण गरेको जनगुनासो छ ।
