काठमाडौं । खोटाङ र भोजपुरमा सडक खनिरहेका चार वटा स्काभेटरमा आगोजनी भएको छ । गोल्डेन गुड शेर्पा कन्ट्रक्सन अन्तर्गतका ति उपकरणमा अज्ञात समुहले गत शनिबार राति आगो लगाएको सो कन्ट्रक्सनले जनाएको छ । म्यानेजर गोपाल थापाका अनुसार खोटाङमा तीन वटा र भोजपुरमा एक वटा स्काभेटरमा आगो लगाइएको छ ।
निर्माणस्थलमा शनिबार राति ९ बजेसम्म काम गरेको स्काभेटर मध्यराति अज्ञात समुहले जलाईदिएका हुन् । आगजनीका कारण दुई वटामा सामान्य क्षति भएको भने अरु दुई वटामा बढि क्षति भएको स्थानीयबासीले जनाएका छन् । खोटाङका डिएसपी बामदेव गौतमका अनुसार आगो लगाउने समुहको खोजीका लागि प्रहरी परिचालन गरिएको छ ।
खोटाङ्को दिक्तेल–चखेवाभन्ज्याङ सडकको काम गरिरहेका स्काभेटरमाथि भएको आगजनीबाट चार करोडभन्दा बढिको क्षति भएको कम्पनीले दावी गरेको छ । ९० लाख मूल्यका स्काभेटरमा पूर्ण क्षति भएकोले कम्पनीले डिजेलसहित पूर्ण क्षति अन्तर्गत चार करोडको बीमा दावी प्रक्रिया अघि बढाएको जनाएको छ ।
यद्यपि पुरानो अवस्थाका स्काभेटर भएकोले दावी अनुसारको मूल्य भुक्तानी हुन भने कठिन छ । दुई वर्ष पुराना स्काभेटर बार्षिक १० प्रतिशतका दरले ह्रास कट्टी गर्दा दुई करोड ८८ लाखको सम्पत्तिमा क्षति पुगेको देखिएको छ । पूर्ण रुपमा क्षति भएको ठहर भएमा मात्रै उक्त सो बराबरको बीमा दावी भुक्तानी हुन सक्ने जनाइएको छ ।
सो स्काभेटर आगजनीको बीमा दावी एभरेष्ट इन्स्योरेन्समा पर्ने भएको छ । क्षति पुगेका चार वटै स्काभेटरको बीमा एभरेष्ट इन्स्योरेन्समा गरेको खुलेको छ । हालसम्म पनि एभरेष्ट इन्स्योरेन्सले क्षतिको मूल्याङ्कनको लागि सर्भेयर परिचालन गरिसकेको छैन । आगो लगाउने समुहले यसअघि चन्दा नमागेको गोल्डेन गुड शेर्पा कन्ट्रक्सनका म्यानेजर थापाले इन्स्योरेन्स खवरलाई बताए ।
