काठमाडौं । आइएमई जनरल इन्स्योरेन्स कम्पनीले आर्थिक वर्ष २०७६।७७ को प्रथम त्रैमासको वित्तीय विवरण सार्वजनिक गरेको छ । कम्पनीले आर्थिक वर्ष २०७६।७७ को प्रथम त्रैमासको अवधिसम्म ३३ करोड रुपैयाँ कुल बीमा शुल्क आर्जन गर्न सफल भएको छ । त्यस्तै कम्पनीले पौने तीन करोड नाफा कमाउन सफल भएको छ ।
चालु आबको पहिलो त्रैमासमा सबै बीमा कम्पनीहरुले व्यापार बृद्धि गर्न सफल भएका छन् । आईएमई जनरल इन्स्योरेन्सले गत आवको सोही अवधिको तुलनामा ४ प्रतिशतले बढी बीमा शुल्क आर्जन गर्न सफल भएको छ । गत आवको सोही अवधिमा कम्पनीले ३१ करोड ७४ लाख रुपैयाँ कुल बीमा शु्ल्क आर्जन गरेको थियो ।
आर्थिक वर्ष २०७६।७७ को प्रथम त्रैमासको समीक्षा अवधिमा कम्पनीले २ करोड ७४ लाख रुपैयाँ खुद नाफा कमाएको छ । गत आवको सोही अवधिमा यो नाफा ५ प्रतिशतले बढी हो । गत आवको सोही अवधिमा कम्पनीले २ करोड ६१ लाख रुपैयाँ खुुद नाफा कमाएको थियो ।
त्यस्तै, आर्थिक वर्ष २०७६।७७ को प्रथम त्रैमासको अवधिसम्ममा कम्पनीले १६ करोड ५१ लाख रुपैयाँ खुद बीमा शुल्क आर्जन गरेको छ । गत आवको सोही अवधिमा कम्पनीले १२ करोड ३५ लाख रुपैयाँ खुद बीमा शुल्क आर्जन गरेको थियो ।
कम्पनीले प्रथम त्रैमासको अवधिमा २५ हजार दुई सय ९३ वटा बीमालेख जारी गर्न सफल भएको छ । एक अर्ब २ करोड रुपैयाँ चुक्ता पूँजी रहेको कम्पनीको जगेडा कोषमा १७ करोड ८१ लाख रुपैयाँ रहेको छ । कम्पनीको बीमा कोषमा २६ करोड रुपैयाँ संचिति रहेको छ ।
कम्पनीले आर्थिक वर्ष २०७६।७७ को प्रथम त्रैमासको अवधिमा १० करोड ३२ लाख ३५ हजार रुपैयाँ कुल दावी भुक्तानी गरेको छ ।
