काठमाडौं । भारतद्वारा अतिक्रमित नेपालको पश्चिमी सीमा लिपु लेकदेखि लिम्पियाधुरासम्म सुदरपश्चिम सरकारले बाटो बनाउने निर्णय गरेको छ । सोमबार बसेको सुदुरपश्चिम सरकारको मन्त्रिपरिषदको बैठकले भारतले अतिक्रमण गरेको लिपुलेक तथा लिम्पियाधुरासम्म गोरेटो बाटो बनाउने निर्णय गरेको हो ।
सुदुर पश्चिम प्रदेश सरकारको मन्त्रिपरिषदको बैठकले उक्त क्षेत्रमा सुरक्षाकर्मी परिचालन गर्न संघीय सरकार समक्ष सिफारिस समेत गरेको छ । मन्त्रिपरिषद् बैठकले दार्चुलाको व्यास गाउँपालिका–२ को तुम्लिङदेखि टिंकर हुँदै छांगारुसम्म गोरेटो बाटो नेपाल सरकारको सहकार्यमा प्रदेश सरकारले निर्माण गर्ने निर्णय गरेको छ ।
प्रदेश सरकारको निर्णयले भारतले सार्वजनिक गरेको नयाँ नक्सामाथि कडा चुनौति दिएको छ । भारतले आफ्नो राजनीतिक नक्सामा नेपालको भू–भाग समावेश गरेपछि सुदुरपश्चिम सरकारले यस्तो निर्णय गरेको हो ।
सोमबार बसेको मन्त्रिपरिषद् बैठकले गरेका निर्णय सुनाउँदै सरकारका प्रवक्ता तथा आन्तरिक मामिला तथा कानुनमन्त्री प्रकाश शाहले सुदूरपश्चिम प्रदेश सरकार सीमा सुरक्षाका लागि संघीय सरकारसँग समन्वय गरी अगाडि बढ्न लागेको बताए । दार्चुला जिल्लाको व्यास गाउँपालिकामा पर्ने उक्त भूमिलाई भारतले आफ्नो नक्सामा समावेश गरेको विषयप्रति प्रदेश सरकारको गम्भीर ध्यानाकर्षण भएको जनाउँदै गोरेटो बाटो निर्माण गर्ने निर्णय गरेको हो ।
