काठमाडौं । दशैं मनाएर सिन्धुपाल्चोकबाट कार्यक्षेत्र काठमाडौं फर्केका यात्रुहरुले भरिएको एक बस शुक्रबार विहान दुर्घटना हुँदा आठ जना यात्रुको मृत्यु भएको छ भने झण्डै तीन दर्जनभन्दा बढि घाइते भएका छन् ।
सिन्धुपाल्चोक जिल्लाको इन्द्रावती गाउँपालिका १० बडहरेबाट काठमाडौं आउँदै गरेको बा२ख २७१५ नम्बरको यात्रुबाहक बस भोटसिपाको तिखुमोडमा दुर्घटनामा परेको हो । दशैं मनाएर काठमाडौं फर्कदै गरेका ७० भन्दा बढि यात्रु रहेको जनाइएको छ । दुर्घटनास्थल काभ्रेको जिरोकिलोबाट मेलम्चीतर्फ करिब १५ किमीको दुरीमा पर्दछ ।
घटनास्थलमा प्रहरी पुगिसकेको र उद्धार कार्य जारी रहेको बताइएको छ । सार्वजनिक यातायात दुर्घटनामा परी धेरै धनजनको क्षति भएका कारण तेस्रो पक्ष बीमा अन्तर्गत झण्डै करोड रुपैयाँ बीमा दावी पर्ने प्रारम्भिक अनुमान गरिएको छ ।
सडकबाट झण्डै डेढ सय मिटर तल खसेर दुर्घटनाग्रस्त बनेको घाइतेको यकिन संख्या प्राप्त भएको छैन । स्थानीय प्रत्यक्षदर्शीले अधिकां यात्रुहरु घाइते भएको जनाएका छन् । हाल उद्धार कार्य जारी रहेकाले मृतकको सनाखत गर्ने हुन बाँकी रहेको प्रहरीले जनाएको छ ।
