काठमाडौं । प्रधानमन्त्री ओलीले डेढ वर्षअघि प्रधानमन्त्रीमा नियुक्त भएदेखि नै देख्न थालेको पानी जहाज सपना सानै भएपनि नारायणी नदिमा चलाएर छिट्टै पूरा हुँदैछ । तर, उक्त पानी जहाज चलाउनको लागि बीमा बाधक बन्ने देखिएको छ । परिक्षण गर्न कुनै समस्या नभए पनि व्यवसायिक रुपमा सञ्चालनको लागि भने बीमा अनिवार्य हुन्छ । नेपालको बीमा ऐनमा पानी जहाज बीमा गर्ने सम्बन्धी व्यवस्था नभएका कारण उक्त पानी जहाजको तत्काल बीमा नहुने भएको छ ।
एक बीमा कम्पनीका सिईओले भने, ‘पानी जहाज बीमा गर्ने कानुन नै नभएकोले उक्त पानी जहाज र सोमा सवार यात्रुको बीमा गर्न सकिदैन ।’ बीमा समितिले पनि पानी जहाजको बीमा गर्न कानुन अभाव रहेको स्वीकार गरेको छ ।
बीमा ऐनमा सवारी साधन अन्तर्गत हवाई जहाज, मोटर तथा सवारी साधनको बीमा गर्ने भन्ने उल्लेख भएपनि पानी जहाज र सोमा सवार यात्रुको बीमा सम्बन्धी कुनै व्यवस्था नभएका कारण नारायणी नदिमा राईनो इन्टरनेटमेन्ट प्रा.लिले छिट्टै सञ्चालनमा ल्याउन लागेको पानी जहाज बीमा समस्याका कारण अल्झिने देखिएको छ ।
बीमा समितिले पनि सो सम्बन्धमा केही बताएको छैन । नयाँ बीमा ऐन संसदमा रहेकाले पनि बीमा समितिले छुट्टै संशोधन प्रस्ताव अघि बढाउन मिल्ने अवस्था छैन । बीमा ऐनमै कल्पना नगरिएको चिज सञ्चालनमा आउने भएपछि यातायात व्यवस्था विभागलाई अर्को समस्या थपिएको छ ।
प्रधानमन्त्री ओलीले पटक पटक पानी जहाजको कुरा उठाएको सन्दर्भमा बल्लतल्ला चल्न लागेको पानी जहाजलाई यातायात व्यवस्था ऐन अनुसार तेस्रो पक्ष र यात्रु बीमा नगरी सञ्चालन गर्न पाइदैन भने बीमा ऐनले पानी जहाज बीमा गर्ने व्यवस्था नभएकोले प्रधानमन्त्री ओलीको पानी जहाज सपनामा बीमा ऐन बाधक बन्ने भएको हो । नारायणी नदिमा तयार हुँदै गरेको पानी जहाज दशैं अघि नै परिक्षण गरी उद्घाटन गर्ने तयारीमा निर्माता राईनो इन्टरटेनमेन्ट पुगेको छ ।
एक पटकमा २३० जना यात्रु बोक्ने क्षमताको पानी जहाज दुई तल्ले पूर्ण वातानुकूलित हुनेछ । जहाज व्यवसायिक भन्दा पर्यटकहरुको लागि प्रयोग गरिने योजना छ । २५ किमी क्षेत्रमा जहाजबाट यात्रा गर्न मिल्नेछ ।
