काठमाडौं । पुँजि बजारको बृद्धिदर परिसूचक नेप्से सोमबार १४ अंकभन्दा बढिले घटेर ११७०.३४ मा झरेको छ । आइतबार पनि ऋणात्मक रहेको नेप्से परिसूचक सोमबार झनै तल झरेको छ । घट्ने क्रममा जीवन बीमा कम्पनीहरुको बजार मूल्य सबैभन्दा धेरे घटेको छ ।
नेपालीहरुको राष्ट्रिय पर्व सुरु भइसक्दा पनि पुँजि बजारमा सुधार हुन नसक्दा लगानीकर्ता एकपछि अर्को गर्दै निराशाजनक स्थितिको सामना गर्न बाध्य छन् ।
सोमवारको कारोबारमा नेप्से परिसूचक १४ दशमलव ४५ अंक घटेको छ । आईतबार १ हजार १८४ दशमलव ९४ विन्दुबाट शुरु भएको परिसूचक कारोबारको पहिलो आधा घण्टाको अवधिमा केही अंक बढेपछि लगातार घट्ने क्रममा रहेर बजार बन्द हुँदासम्म एक दशमलव २२ प्रतिशतले घट्न पुगेको छ ।
कारोबार भएका ११ समूहमध्ये सबै समूहको परिसूचक ऋणात्मक छ । सोमबार जीवन बीमा समूहको परिसूचक सर्वाधिक १ दशमलव ७९ प्रतिशत घट्यो भने बैंकिङ, जलविद्युत, वित्त, निर्जीवन बीमा, ‘अन्य’ र लघुवित्त समूहका परिसूचक १ प्रतिशतभन्दा बढीले घटेपछि समग्र सूचक १४ अंकले घट्न पुगेको थियो ।
तीजको दिन समेत परेको सोमबार शेयर बजारमा ४० करोड ७५ लाख बराबरको शेयर कारोबार भयो । कारोबार रकम बढि भएपनि मूल्य भने घटेको छ ।
