काठमाडौं । कृषि तथा पशुपंक्षीको बीमामा तीव्र स्तरमा बृद्धि भएको छ । बीमा समितिको तथ्याङक अनुसार आर्थिक बर्षको साउनसम्ममा कृषि तथा पशुपन्छी बीमामातर्फ २० अर्ब ७१ करोड रुपैयाँ बीमांक रकमको बीमा गरिएको छ ।
गत आर्थिक वर्षमा पशुपंक्षी बीमातर्फ १९ अर्ब ७८ करोड ६६ लाख रुपैयाँको जोखिम बहन गरेका छन् । त्यस्तै बालीबीमातर्फ ९२ करोड ४० लाख ६६ हजार रुपैयाँको जोखिम बहन गरेको बीमा समितिले उपलब्ध गराएको तथ्याङ्कमा उल्लेख छ । आर्थिक बर्षको असार मसान्तसम्ममा निर्जिवन बीमा कम्पनीहरुले बाली बीमा अन्तर्गत एक हजार ९३३ बीमालेख जारी भएको छ ।
स्रोत:बीमा समिति
बीमा समतिले प्रकाशन गरेको बाली तथा पशुपन्छी बीमा विवरण अनुसार साउन अन्तिम सम्ममा बालीतर्फ चार करोड ४९ लाख ६४ हजार रुपैयाँ संकलन गर्न सफल भएको छ । त्यस्तै पशुपन्छी बीमा अन्तर्गत कूल ८९ करोड चार लाख २५ हजार रुपैयाँ बीमा शुल्क आर्जन भएको छ ।
त्यस्तै पशुपन्छी बीमा अन्तर्गत एक लाख नौ हजार एक सय २४ बीमालेख जारी भएको छ । बाली र पशुपन्छी बीमा अन्तर्गत साउनसम्ममा कुल एक लाख ११ हजार बीमालेख जारी भएको छ भने ९३ करोड ५३ लाख ८९ हजार कुल बीमाशुल्क आर्जन गर्न सफल भएको छ । सरकारले कृषि बीमामा आकर्षण बढाउन प्रत्येक वर्ष अनुदान रकम विनियोजन गर्दै आएको छ ।
बाली बीमा अन्तर्गत ३३ करोड ७२ लाख ३२ हजार रुपैयाँ र पशुबीमा अन्तर्गत ६६ करोड ७८ लाख १६ हजार रुपैयाँ अनुदान मार्फत प्राप्त भएको छ ।
