काठमाडौं । नेपाल राष्ट्र बैंकका गभर्नर डा. चिरञ्जीवी नेपालले गलत गर्ने जुनसुकै बैंक, वित्तिय संस्था तथा यसका सञ्चालक र प्रशासकमाथि कडा कारवाही गरिने प्रतिबद्धता जनाएका छन् । पश्चिम नेपालको बुटवलमा आयोजित तिनाउ मिशन विकास बैंकको एकीकृत कारोबार शुभारम्भ कार्यक्रमको उद्घाटन गर्दै गभर्नर डा. नेपालले यस्तो बताएका हुन् ।
दुई विकास बैंकको मर्जर सम्पन्न भई एकीकृत कारोबार शुभारम्भ कार्यक्रमलाई सम्बोधन गर्दै गभर्नर डा. नेपालले सञ्चालक र प्रशासकको नियत सही भएमा मर्जर सफल हुने बताए । बैंकहरुको प्रभावकारिताको लागि मर्जर आवश्यक उनले औल्याए ।
गभर्नर डा. नेपालले गलत गर्ने कसैलाई पनि नछाड्ने भन्दै त्यस्तालाई कारवाही गरिने प्रष्ट पारेका छन् । गभर्नर डा. नेपालले सुरूमा सच्चिन मौका दिने त्यसपछि मात्रै कारवाही गरिने समेत बताए । केही द्विविधा भए राष्ट्र बैकले बाटो देखाइदिन तयार रहेको भन्दै गभर्नर नेपालले नेपालका बैंकिङ क्षेत्रको गलत कुराहरु केन्द्रीय बैंकले नियमन गर्ने बताए ।
वुटवलका दुई वित्तीय संस्था तिनाऊ र मिशन विकास बैंक गाभिएपछि बैंकको नाम तिनाउ मिसन डेभलपमेन्ट बैंक राखिएको छ । बराबरी शेयर हैसियतमा संस्था गाभिएका दृुई वित्तीय संस्थाले हकप्रद शेयर जारी गर्नेछन् । सहमति समेत भएको छ । मर्जरसँगै चुक्ता पूँजी एक अर्व १४ करोड रुपैयाँ पुगेको छ ।
