काठमाडौं । एनएमबि बैंकको विशेष साधारण सभा सम्पन्न भएको छ । सो सधारणसभाले ओम डेभलपमेन्ट बैंकसँग मर्ज गर्ने विशेष प्रस्ताव अनुमोदन गरेको सो बैंकले जनाएको छ ।
मंगलबार ललितपुरको जावलाखेलमा सम्पन्न कम्पनीको सभाले गाभ्ने–गाभिने सम्बन्धमा सञ्चालक समितिले यसअघि गरेका निर्णयहरु अनुमोदन गरेको हो ।
एनएमबि र ओमबीच १००ः७६ अनुपातमा मर्ज हुने प्रक्रिया अघि बढेको छ । मर्जरका लागि नियामक निकाय नेपाल राष्ट्र बैंकले असार ८ गते सैद्धान्तिक सहमति दिइसकेको छ ।
यता, ओमले पनि सोमबार विशेष साधारण सभा गरेर मर्ज प्रस्ताव अनुमोदन गरिसकेको छ । दुवै वित्तिय संस्थाको विशेषसधारणसभाले मर्जरमा जाने प्रस्तावा पास गरेकाले अब उक्त दुई वित्तिय संस्थाबीच आपसमा गाभिने निश्चित भएको छ ।
मर्जरपछि एनएमबि बैंक नै नाम राखिने भएको छ । मर्जर पश्चात एनएमबि बैंकको कूल पुँजी तथा जगेडा कोष बृद्धि भई २० अर्ब ४२ करोड रुपैयाँ हुने सहमति यसअघि नै दुवै पक्षका बीचमा भइसकेको छ ।
गत जेठ २ गतेदेखि औपचारिक रुपमा हस्ताक्षर गरेर सुरु भएको मर्जर प्रक्रिया अनुसार एनएमबि र ओम मर्जपछि अधिकृत, जारी तथा चुक्ता पुँजी वृद्धि हुने भएकाले प्रबन्धपत्र संशोधन गर्ने जिम्मा सञ्चालक समितिलाई दिने निर्णय गरिएको छ ।
लेखा परीक्षकको नियुक्ति र पारिश्रमिक अनुमोदन गर्ने प्रस्ताव पनि पारित भएको छ । एनएमबिले सेयर ब्रोकरको काम गर्ने प्रस्ताव पनि पारित भएको छ ।
