ग्लोबल आइएमई बैंकको नाफा २ अर्बमाथि

ग्लोबल आइएमई बैंकले गत आर्थिक वर्ष २०७५/७६ को चौथो त्रैमासको वित्तीय विवरण प्रकाशित गरेको छ । आर्थिक वर्ष २०७५/७६ को चौथो त्रैमाससम्म आइपुग्दा २ अर्ब ७९ करोड रुपैयाँ खुद नाफा कमाएको छ । अघिल्लो आर्थिक वर्षको सोही अवधिको तुलनामा बैंकको नाफा ३३ प्रतिशतले बढी हो । अघिल्लो वर्षमा ग्लोबल आइएमई बैंकले २ अर्ब १० करोडरुपैयाँ खुद नाफा कमाएको थियो ।

गत आर्थिक वर्षको चौथो त्रैमाससम्म आइपुग्दा बैंकको वितरण योग्य मुनाफा २ अर्ब ४२ करोड रुपैयाँ पुगेको छ ।

आर्थिक वर्ष २०७५/ ७६ को १२ महिनाको अवधिसम्ममा बैंकले १ खर्ब २० अर्ब ८ करोड रुपैयाँ निक्षेप संकलन गरी १ खर्ब ८ अर्ब ९८ करोड रुपैयाँ कर्जा प्रवाह गरेको छ । गत आर्थिक वर्षको सोही अवधिको तुलनामा बैंकले निक्षेपमा १५ प्रतिशतले बृद्धि गरेको हो भने कर्जा प्रवाहमा २३ प्रतिशतले बृद्धि गरेको हो ।
गत आर्थिक वर्षको १२ महिनाको अवधिसम्म आइपुग्दा बैंकको खुद ब्याज आम्दानी ३३ प्रतिशतले बृद्धि गरेको छ । अवधिमा बैंकको प्रतिसेयर आम्दानी २७ रुपैयाँ ११ पैसा र प्रतिसेयर नेटवर्थ १ सय ५८ रुपैयाँ ६२ पैसा रहेको छ ।

जनता बैंकसँग मर्जमा जान ग्लोबल आइएमईले हस्ताक्षर गरिसकेको छ । यस्तै, ग्लोबलले हाथवे फाइनान्सलाई पनि एक्वायर गर्न लागेको छ ।

प्रतिक्रिया दिनुहोस्

सम्बन्धित समाचार