काठमाडौं । निर्जिवन बीमा कम्पनी यूनाइटेड इन्स्योरेन्सले जारी गर्न लागेको हकप्रद शेयरको लागि प्रमोटर शेयरधनीहरुले ४० करोड रुपैयाँ जम्मा गरेका छन् । हकप्रद शेयर निष्काशनका लागि तोकिएको बिक्री प्रबन्धक एनएमबी क्यापिटलमा एक प्रतिशतभन्दा माथि शेयर भएका संस्थापक लगानीकर्ताहरुले रकम जम्मा गरेका हुन् ।
यूनाइटेड इन्स्योरेन्सका निमित्त प्रमुख कार्यकारी अधिकृत रमेश कुमार भट्टराईले संथापक शेयरधनीहरुले हकप्रद शेयर खरिदका लागि ४० करोड रुपैयाँ जम्मा गरिसकेको जानकारी दिए । सिईओ भट्टराईका अनुसार बिहिवार नै उक्त रकम जम्मा गरेका हुन् ।
कम्पनीले निष्काशन गर्न लागेको १ः२.४ अनुपातको हकप्रद सेयर लिनको लागि प्रवद्धर्कहरुले विहीबारसम्ममा लगानी गरिसकेको कम्पनीले जनाएको छ । सो कम्पनीले ७२ करोड ५७ लाख रुपैयाँ बराबरको हकप्रद सेयर निष्काशन गर्न अनुमति पाएको छ । सिईओ भट्टराईका अनुसार यही साउन १३ गतेको शेयर लगत किताबमा रेडर्क भएका शेयरधनीहरुले उक्त शेयर खरिद गर्न पाउनेछन् । प्रयोजनको लागि १४ गते बुक क्लोज गरिनेछ ।
प्रमोटर शेयरलगानीकर्ताहरुले शतप्रतिशत रकम जम्मा गरेपछि अब साधारण शेयरधनीहरुका लागि हकप्रद शेयर आह्वान गर्ने बाटो खुलेको छ ।
बिहीबार कम्पनीको सेयर प्रति कित्ता ८५० रूपैयाँमा कारोबार भएको थियो । कूल चुक्ता पुँजी ३० करोड २४ लाख रुपैयाँ रहेको कम्पनीले २४० प्रतिशत हकप्रद शेयर जारी गरे पश्चात ७२ करोड रुपैयाँ थप भई कूल एक अर्ब दुई करोड चुक्ता पुजि पुग्नेछ ।
