एजेन्सीहरु । विश्व अर्थतन्त्रबारे सुक्ष्म नियमन गर्ने अन्तर्राष्ट्रिय मुद्रा कोषकी सिईओ क्रिस्टियन लागार्डले पदबाट राजिनामा दिएको घोषणा गरेकी छिन् । बीबीसीका अनुसार आगामी सेप्टेम्वर १२ गतेदेखि लागू हुने गरी लागार्डले पदबाट राजिनामा दिएकी हुन् । युरोपेली केन्द्रीय बैंकले लागार्डलाई अध्यक्षमा मनोनयन गर्ने प्रस्ताव राखे लगत्तै राजिनामाको घोषणा गरेकी छिन् ।
क्रिस्टियन लागार्डले राजिनामा लगत्तै भनेकी छिन, ‘युरोपेली केन्द्रीय बैंकको अध्यक्षको रुपमा मेरो मनोनयनको प्रक्रिया शुरु भएको छ । मैले मुद्रा कोषको सर्वोत्तम हितका आधारमा यो निर्णय लिएकी छु । यसबाट कोषमा नयाँ कार्यकारी प्रमुख छनौट गर्ने बाटो खुला गर्न मद्दत गर्नेछ ।’ युरोपेली केन्द्रीय बैंकको अध्यक्ष पद रिक्त हुँदैछ । सो बैकका अध्यक्ष मारियो ड्रागीको आठ वर्षे कार्यकाल आगामी नोभेम्बरमा समाप्त हुँदैछ ।
सन् १९५६ मा फ्रान्सको पेरिसमा जन्मेकी लागार्ड सन् २००७ मा फ्रान्सको अर्थमन्त्री, २००५ मा व्यापार मन्त्रीमा नियुक्त भएकी थिईन् । विश्व अर्थतन्त्रमा सटही सन्तुलन मिलाउने कार्यमा महत्वपूर्ण भूमिका निर्वाह गर्दै आएको अन्तर्राष्ट्रिय मुद्रा कोषबाट लागार्डले राजिनामा दिएसँगै नयाँ प्रमुख कार्यकारीको खोजी सुरु भएको छ ।
उनी सन् २०११ मा आईएमएफको प्रमुखमा नियुक्त भएकी थिईन् । उनको आठ वर्षको कार्यकालमा अर्थतन्त्रलाई स्थिर राख्न भूमिका निर्वाह गरेको अन्तर्राष्ट्रिय सञ्चार माध्यमहरुले उल्लेख गरेका छन् ।
युरोपेली केन्द्रीय बैंकको अध्यक्ष बन्ने निश्चित भएसँगै लागार्डलाई अन्तर्राष्ट्रिय वित्त क्षेत्रकी कडा चट्टानको रुपमा चर्चा गरिएको छ ।
