सामाजिक सुरक्षा कोषमा विभिन्न पदमा ६६ जनालाई जागिरको अवसर खुलेको छ । लोकसेवा आयोगको सहमतिमा कोषमा रिक्त रहेका पदहरुमा खुला प्रतियोगिताद्वारा स्थायी पदपूर्ति गर्नका लागि कोषले कर्मचारीको माग गरेको हो ।
११ तहका उपकार्यकारी निर्देशकदेखि ४ तहका सहायक कम्प्युटर अपरेटरसम्म आवेदन खुलाइएको हो । निर्देशक, वरिष्ठ सहायक निर्देशक, सहायक निर्देशक, प्रशासकीय अधिकृत, लेखा अधिकृत, सूचनाप्रविधि अधिकृत, वरिष्ठ प्रशासन सहायक, लेखापाल, कम्प्युटर अपरेटर, सहायक लेखापाल र सहायक कम्प्युटर अपरेटर पदमा आवेदन खुलाएको कोषले जनाएको छ ।
इच्छुक तथा योग्यता पुगेका उम्मेदवारले असार ५ गतेसम्म अनलाइन मार्फत आवेदन दिन सक्ने कोषले जनाएको छ । १२ गतेसम्म दोब्बर दस्तुरमा आवेदन दिन सकिनेछ । ११ तहका लागि १५ सय, ९ र १० तहका लागि १२ सय(समावेशी प्रत्येक समूहको थप ५ सय), ६, ७ र ८ तहका लागि १ हजार (समावेशी प्रत्येक समूहको थप ४ सय), ५ तहका लागि ४ सय (समावेशी प्रत्येक समूहको थप २ सय ) र तह ४ का लागि ३ सय (समावेशी प्रत्येक समूहको थप १ सय ५०) दस्तुर बुझाई आवेदन दिन सकिने छ ।
परीक्षा केन्द्र काठमाडौँमा रहने र लोकसेवा आयोगबाट परीक्षा सञ्चालन हुने कोषले जनाइएको छ ।
