एसम्यानको खोजीमा बीमा कम्पनीका सञ्चालक

प्रमुख कार्यकारी बिहीन छन् बीमा कम्पनीहरू
भर्खरै सञ्चालनमा आएका बीमा कम्पनीका सञ्चालकहरुले एसम्यानको खोजी गर्न थालेका छन् । आफुले भनेको जस्तै काम गर्ने एसम्यान नभेटिदा कम्पनीहरु प्रमुख कार्यकारी बिहीन भएका छन् । अझै पनि केही कम्पनीहरुमा सेकेण्डम्यानले काम चलाई रहेका छन् ।

नेपालमा हाल ३९ वटा बीमा कम्पनी छन् । जसमध्ये भर्खरै सञ्चालनमा आएका नौ जीवन बीमा कम्पनीमध्ये आधामा प्रमुख कार्यकारी छैनन् । जुन अझै नायव कार्यकारीले नै चलाई रहेका छन् ।

नयाँ कम्पनीमध्ये आईएमई लाइफ इन्स्योरेन्स कम्पनीले सबैभन्दा पहिला कारोबार सुरुवात गरेको थियो । कम्पनीले गत बर्षको साउनबाट नै कारोबार सुरु गरे पनि प्रमुख कार्यकारी भने तोकेको छैन । कम्पनीले राकेश पोख्रेललाई नायब प्रमुख कार्यकारीको रूपमा नियुक्त गरेको थियो । तर, उनी सञ्चालकले खोजे जस्तो एसम्यान नहुँदा छ महिनामा नै कम्पनीले छोड्न बाध्य भए । अहिले कम्पनीले श्रीचन्द्र भटट्लाइ प्रमुख कार्यकारी अधिकृत नियुक्त गर्ने तयारी गरेको छ । त्यस्तै, ज्योति लाइफ इन्स्योरेन्सले गत बर्षको भदौ महिनादेखि नै कारोबारको सुरुवात गरेको हो । तर, कम्पनीले प्रमुख कार्यकारी भने अहिलेसम्म नियुक्त गरेको छैन । कम्पनीले प्रकाश विक्रम खत्रीलाई कार्यवाहक प्रमुख कार्यकारी अधिकृत तोकेको छ ।

त्यसैगरी सानिमा लाइफ इन्स्योरेन्सले नायव प्रमुख कार्यकारी अधिकृतमा केशवराज केसीलाई नियुक्त गरेको छ । समितिका अनुसार कम्पनीले प्रमुख कार्यकारी भने अहिलेसम्म नियुक्त गरेको छैन । प्रभु लाइफ इन्स्योरेन्स कम्पनी पनि प्रमुख कार्यकारी अधिकृत विहिन छ । सन नेपाल लाईफ इन्स्योरेन्सले पनि राजकुमार अर्याललाई कार्यवाहक प्रमुख कार्यकारी अधिकृतको जिम्मेवारी दिएको छ ।

सिटिजन्स लाईफको प्रमुख कार्यकारी अधिकृतमा पोषकराज पौडेल,युनियन लाईफमा मनोज कुमार लाल कर्ण, रिलायबल लाइफ इन्स्योरेन्समा नारायण बाबु लोहनी र रिलायन्स लाइफ इन्स्योरेन्स कम्पनीमा प्रवीण रमण पराजुली प्रमुख कार्यकारी अधिकृतमा नियुक्त भएका छन । नियुक्त भएका प्रमुख कार्यकारीमध्ये मनोजकुमार लाल कर्ण र पोषक राज पौडेल बीमा क्षेत्रबाट आएका हुन् । नारायण बाबु लोहनी र प्रवीणरमण पराजुली बैंकिङ क्षेत्रबाट बीमा क्षेत्रमा प्रवेश गरेका हुन् । त्यस्तै, आईएमई लाईफले नियुक्त गर्न लागेका प्रमुख कार्यकारी अधिकृत श्रीचन्द्र भटट् पनि बैंकिङ्ग क्षेत्रबाट आएका हुन् ।

नयाँ निर्जीवन कम्पनीहरुमध्ये एउटामा मात्रै प्रमुख कार्यकारी छन् । दुई वटा कम्पनी भने अहिलेसम्म प्रमुख कार्यकारी बिहिन छन् । अजोड इन्स्योरेन्समा कुमार बहादुर खत्री प्रमुख कार्यकारी नियुक्त भएका छन् । उनी यस अघि लुम्बिनी जनरल इन्स्योरेन्समा कार्यरत थिए । त्यस्तै जनरल इन्स्यारेन्समा एसके तमोट प्रमुख कार्यकारी नियुक्त हुने तयारीमा छन् । सानिमा जनरल इन्स्यारेन्समा प्रमुख कार्यकारी नियुक्त गरिएको छैन ।

पुराना कम्पनीमध्ये युनाईटेड इन्स्योरेन्समा पनि प्रमुख कार्यकारी अधिकृत नियुक्त गरिएको छैन । यस अघिका प्रमुख कार्यकारी अधिकृत शेखर बरालले राजीनामा दिएपछि रमेश कुमार भटट्राईलाई कार्यवाहकको जिम्मेवारी दिईएको छ । एनएलजी इन्स्योरेन्सका पूर्व प्रमुख कार्यकारी अधिकृत विजय बहादुर शाहले कम्पनी छोडेपछि सुनिल बल्लभ पन्तलाई कार्यवाहक प्रमुख कार्यकारी अधिकृतको जिम्मेवारी दिईएको छ ।

नेपालमा प्रमुख कार्यकारी अधिकृतको लागि सक्षम व्यक्ति नभेटिएका कारण कम्पनीहरु प्रमुख कार्यकारी बिहिन बनेको कम्पनीका सञ्चालकहरु बताउँछन् । तर, कम्पनीले आफुले खोजे जस्तो एसम्यान नपाएर प्रमुख कार्यकारी तोक्न नसकेको सरोकारवालाहरु बताउँछन् । त्यस्तै कम्पनीहरुले सक्षम व्यक्तिलाई पनि दोस्रो व्यक्ति बनाएर राखेका छन् । दोस्रो पदमा नियुक्त गरेपछि सुविधा कम दिनुपर्ने भएर कम्पनीले नै यस्तो प्रपञ्च रचेको सरोकारवालाहरु बताउँछन् । त्यस्तै, केही बिज्ञहरु भने कम्पनीका सञ्चालकको माग पुरा गर्न जो कोहीको हिम्मत नभएकै कारण पनि कम्पनीहरुले प्रमुख कार्यकारी नपाएको बताउँछन् ।

प्रतिक्रिया दिनुहोस्

सम्बन्धित समाचार