काठमाडौं : युनाईटेड इन्स्योरेन्स कम्पनीले चुक्ता पूँजी पुराउनको लागी सबै विकल्पहरु खुल्ला गरेको छ । कम्पनीले मर्जर गरेर, रणनीतिक साझेदार भित्राएर र हकप्रद सेयर जारी गरेर चुक्ता पूँजी बढाउँने योजना बनाएको छ ।
बीमा समितिको निर्देशन अनुसार कम्पनीहरुले गत असार मसान्तसम्ममा पूँजी कायम गरी सक्नु पर्ने थियो । तर, हालसम्म चार वटा कम्पनीले मात्रै समितिले तोकेको पूँजी कायम गरेका छन् । त्यसमध्येमा युनाईटेड इन्स्योरेन्स कम्पनीका पूँजी ३० करोड २४ लाख मात्रै रहको छ । समितिले तोकेको पूँजी पुराउँन कम्पनीले अझै करिब ७० करोड रुपैयाँ थप गर्नुपर्नेछ ।
पूँजी पुराउँनका लागी कम्पनीले २४० प्रतिशत हकप्रद शेयर जारी गर्ने तयारी गरेको कम्पनीका कार्यवाहक प्रमुख कार्यकारी अधिकृत रमेश कुमार भट्टराईले बताए । उनका अनुसार संचालक समितिले हकप्रद सेयर पारित गरि सकेको छ । अब साधारण सभाले पारित गरेपछि हकप्रद सेयर निस्काशन प्रक्रिया अघि बढ्नेछ ।
त्यसैगरी कम्पनीले पूँजी पुराउँनका लागी मर्जरको विकल्प पनि खुल्ला गरेको छ । स्वदेशी कुनै कम्पनीले सहयात्रा गर्न चाहेमा त्यसको लागी पनि कम्पनी तयार रहेको उनले बताए । साथै कम्पनीले बिदेशी रणनीतिक साझेदार भित्राउन पनि तयार रहेको छ । १५ प्रतिशत सेयर लिएर कोही आउँछन् भने सहकार्य गर्न तयार रहेको कम्पनीका कार्यवाहक प्रमुख कार्यकारी अधिकृत भट्टराईले बताए ।
