इन्योरेन्स खवर/काठमाडौं: राष्ट्रिय बीमा कम्पनीले चालू आर्थिक वर्षको नौ महिनाको अवधिमा बीमाशुल्क आम्दानी, लगानी एवं जगेडा कोष सन्तोषजनक प्रगति गरेको छ ।
कम्पनीले तेस्रो त्रैमासिक अवधिमा ४६ करोड १३ लाख रुपैयाँ खुद नाफा आर्जन गरेको छ । कम्पनीले गतआर्थिक वर्षको सोही अवधिमा २६ करोड १३ लाख खुद मुनाफा आर्जन गरेको थियो ।गत वर्षको तुलनामा ७६ दशमलव ५४ प्रतिशतले वृद्धि हो ।
कम्पनीको हालसम्मको व्यवसायिक तथा वित्तीय स्थिति व्यवस्थापनले प्रक्षेपण गरे अनुरुप नै भइरहेको छ । चुक्ता पुँजी २६ करोड ६६ लाख रुपैयाँभन्दा बढि रहेको यस कम्पनीको जगेडा तथा कोषमा २ अर्व २ करोड ५८ लाख र बीमा कोष अन्तर्गत १ अर्व ३० करोड ७४ लाख रुपैयाँ भन्दा बढि रकम राखेको छ ।
समिक्षा अवधिमा खुद बीमा शुल्क १७ करोड ९५ लाख रुपैयाँ भन्दा बढि आर्जन गरेको यस कम्पनीको कुल बीमा शुल्क भने ७६ करोड ९० लाख रहेको छ । जारी बीमालेख संख्या ११ हजार ९ सयमध्ये नविकरण गरिएको बीमालेखको संख्या भने ३ हजार ३ सय ९६ रहेको विवरणमा उल्लेख गरिएको छ ।
त्यस्तै कुल दावी भुक्तानी रकम ५ करोड ७० लाख रुपैयाँ भन्दा कही बढि रहेको यस कम्पनीको कुल दावी भुक्तानी संख्या भने २ सय ४४ रहेको छ ।
कम्पनीको प्रतिशेयर आम्दानी (वार्षिक) १ सय ७३ रुपैयाँ ०१ पैसा, प्रतिशेयर नेटवर्थ ८ सय ४९ रुपैयाँ ७७ पैसा,मुल्य आम्दानी अनुपात ६५ रुपैया र प्रतिशेयर कुल सम्पत्तिको मुल्य १ हजार ३ सय ५० रुपैयाँ रहेको छ ।
