काठमाडौं, वैशाख १९ । बुधबार सेयर बजार परिसुचक नेप्से उतारचढावकाबीच दोहोरो अंकले बढेको छ । कारोबारको सुरुवातमा सकारात्मक नदेखिएको बजार अन्त्यमा ११ दशमलव ३७ अंकले बढेर १ हजार ३ सय ६० दशमलव ३८ को बिन्दुमा बजार बन्द भएको हो ।
आज कारोबारमा आएका नौ समूहमध्ये फाइनान्स र उत्पादन तथा प्रशोधन बाहेकका सबै समूहमा वृद्धि देखिएको छ । जसमध्ये बीमा समूह १०७ दशमलव ०१ अंकले बढेको छ । त्यस्तै लघुवित्त समूह ४६ दशमलव ३६ अंकले, जलविद्युत समूह २६ दशमलव ३ अंकले, होटल समूह २३ दशमलव ४५ अंकले, अन्य समूह १६ दशमलव ० अंकले, विकास बैंक ८ अंकले र बैंकिङ समूह २ दशमलव ७१ अंकले बढेका छन् ।
स्वदेशी लघुवित्तको सर्वाधिक कारोबार
बुधबार परिसुचक बढेपनि कारोबार रकममा भने कमी आएको छ । आइतबार ४० करोड रुपैयाँ बराबरको सेयर कारोबार भएको बजारमा यसदिन १५८ कम्पनीको ३८ करोड ६ लाख ८ हजार ६५३ रुपैयाँको सेयर खरिदबिक्री भएका छन् । सोमबा बुद्ध जयन्ती र मंगलबार अन्तराष्ट्रिय श्रमिक दिवसमा सार्वजानिक बिदा परेकाले सेयर कारोबार भएको थिएन ।
आज सबैभन्दा बढी स्वदेशी लघुवित्त वित्तीय संस्था लिमिटेडको सेयर किनबेच भएको छ । कम्पनीको २ करोड ७५ लाख रुपैयाँको सेयर किनबेच भएको छ । त्यस्तै नेसनल लाईफ इन्स्योरेन्स, नेपाल बैंक, सानिमा माई हाइड्रोपावर, नेपाल इन्भेष्टमेन्ट बैंक लिमिटेड, प्राइम कमर्सियल बैंक, एभरेष्ट बैंक, ग्रामीण विकास बैंक लघुवित्त वित्तीय संस्था र नबिल बैंकको १ करोडभन्दा बढी रुपैयाँको सेयर किनबेच भएको छ ।
मितेरी डेभलपमेन्टको सेयर मूल्य आज १० प्रतिशतले बढेको छ । त्यस्तै सर्वाधिक सेयर किनबेच भएको स्वदेशी लघुवित्तको सेयर भाउ पनि ९ दशमलव ९७ प्रतिशतले बढेको छ । गुमाउनेमा भने आज सिन्धु विकास बैंकका लगानीकर्ता रहेका छन् । बैंकको सेयर मुल्य ६ दशमलव ९१ प्रतिशतले घटेको छ ।
